Weblog prins Bart I

De litste daag veur de carnaval

Noa drie daag ziekenbezeuke, ein bezeuk aan de prinses van de Oosterbeemd, inge sjpringmiddig van de basissjwoal, in tot in de puntjes verzurg bezeuk aan de Blauw Sjuut bie de Brand brouwerie en ’t Auw Wieverbal in Vallekeberg mooste veer vriedigs alweer vreug op. Veer ginge namelijk ontbijte oo t gemeintehoes, en ich dach dat zal waal in gans formeel gebeure weare. Mer nee. Ut woar hjiel gezellig zelfs, de Blauw Sjuut woar aanwezig en het is gebruikelijk dat de burgemeester en de moelemeaker van de sjuut get doan vertille, en doamit make ze grapjes over en weer. Eigenlijk in soort buutetreffe. Noa t oetzweije van de sjuut zint veer noa de peurerspeelzaal gewea, woa veer mit grote ouge werde aangekeke. Dat is natuurlijk gans get es de jeugprins, jeugprinses en de grote prins en prinses oppins veur dich stoan. Diese missjien ellein mer kins van dea poster wat aan de roet hink. Mer noa get chips van raiko en skye en ein paar keer zjweie begoste ze los te komme. Ut is natuurlijk wel de toekomst van sjin wat zich doa ekere daag t amusere is. Ut sjmiddigs zint ver nog langs ein paar “zieken” gewea en ut soaves woar t groat prinsetreffe van Vallekeberg, in Houthem. Dit weurd eker joar door ein ander durp georganiseerd, wat ein leuk concept is want zo heat eker joar in ander durp alle prinse em hun vereniging op bezeuk. Op dr zoaterdig sjtonge de wagenbezeuke op het programma, dan geise es prinsepaar op bezeuk bie de wagens wat mit deilnumme aan de optoch van sjin, ver, in dit joar zelf mit gewea het geluid teste van de sjin romanos, dat ging hendig hell. Het leuke hieaan is dat de groepe dich in alle rust hun thema kinne oetligke want esse op de wage sjteis kriese dat allemoal neet gans mit. T soaves woar t ophoale van de optoch nummers bie A ge Pannes, hienoa hubbe veer hie nog eve gefees. Dat woar t weer veur deze blog, lekker sloape want murrege is t dan zo wiet de optoch van Sjin!

Alaaf!

’t Maske en de ziekebezoeken

Zoa wie ich ‘t vurrig berich geëindigd bin zoa begin ich noe.
‘t Oetreike van ‘t Maske in Vallekeberg.
Eine gezellige aovend mit de vereiniginge van Groat Vallekeberg. Leuk um alle sjtöksjkes euver de prinsepare te laeze, hièl leuk ineingezat. ‘t Dinsdigs waore veer te gat bie de bejaardensoos in ‘t Geboew in Sjin, hie woord ôs durch d’r Piet Bisschops sjoan oetgelag wo t eigelik vandan kump dat es de Raod van 11 noa de soos geit veur de carnaval zíe altied vla mitnumme. Dit kump namelijk dat de soos ins de sjtoffe rat van de cv geklauwd hauw en ze truugk gegaeve haet mit de afsjpraak dat de cv jeker jaor rônd carnaval e bezeuk brink aan de soos en da vla mit brink. Dus noe (volgens mich 36 jaor later) waor dat weer ‘t geval. Nao get polonaises (want dat kinne ze nog waal bie de soos) en get koffie en vla ginge veer nao heim um ôs gereid te make veur de ziekebezeuke die geplend sjtinge veur d’r daag dernoa.
Die ziekebezeuke dat is gans get aparts, vanoet e fièsweekend geiste dan langs bie kranke luuj of luuj die sjlech ter bein zint, zoewaal in Sjin es alle plaatsje wo luuj oet Sjin zint neergestjreke. Zoa zint veer in Sjin, Haelder, Mergraote, Gullepe en Vallekeberg gewaes. Dat haat waal eine impekt op dich. Die reaksies dieste van die luuj truugk kries is geweldig. Dit is weer zoaget wat de cv good geregeld haet, want het is veur ôs in weze mer ein klein mujte meh veur de luuj wooste op bezeuk geis is het get um noats miè te vergaete, Neet dat véér ‘t oait zulle vergaete natuurlik..

Hiemit zou ich auch gaer wille aafsjlete, alaaf

Ein Sjins weekend mit allein meh hoogtepunten!

Noa twiè daag rös woar t woonsdig d’r 15de tied veur de ledevergadering van de CV. Hie waere gèt dinkskes besproake mér auch ’t programma van de komende daag doorgenómme. Esse doa zits en huèrs wat dich nog te wachte steit krieste steeds miè begrip en respek veur de luuj die eker joar kloar stoan veur ’t Prinsepaar. Sjapo. Hienoa woar ’t euveriges erg gezellig en zint veer redelijk laat pas noa heim gegange. D’r donderdig houwe veer ’t soaves énne verjöördaag en ’t is dan waal erg leuk datse al zovööl verhoale kins vertélle euver watse allemoal al höbs métgemaak. ’t Vriedigs woar ’t dan eindelik weekend en woar ’t tied um noa ’t aw wieverbal in d’r proemehook te goan. Zo wie geer ondertósje op vastelaavendinvalkeberg.nl kint zeen woar ’t erg drôk. Zeker esse dich dan bedinks datse van al die aw wievver en verkleide 3 winnaars mós oetkeze. Gelökkig houw ich dan auch hulp van jeugprins Raiko en jeugprinses Skye. En ’t Anne natuurlik. Wat veur ós ein verassing woar, dat zelfs gét kuutebieters oet ulestroate ónder get maskers vandaan koame, want miene naef, nicht en tante houwe zich namelijk auch good versjoale ónder de grote groep aw wiever. Zoaterdigs noadat veer gét bekómme woare van d’r duchtige aovend zint veer noa d’r sjpaarclub aovend gegange bie d’r Henk en ’t Roos in A ge Pannes. Mooi um te zeen wievööl jeug hie aanwezig woar, want dat beteikent dat ’t waal nog ech leef onder de jeug in Sjin. Wat ich ech sjiek vóng woar dat sjpaarclub prins Erwin en ziene minister Thygo waal van ’n partie hakkuh heelte en dit höbbe veer dan auch aeve moage demonstrere op de buun. Auch ich mós d’r aan geluive mér oppins koam d’r man mét d’r hamer en woar ’t veur mich tied um mich de auge toe te doan. ’t Zondigs woar ich auch blie dat ich nog get gesloape höb went um 11 oer sjtinge de manne mét de bordeaux roaje patsje alweer op d’r stoep um noa ’t Mennekestreffe te goan. Noadat ’t Graefke alweer vol geloupe woar starte ’t programma mit oa. ’t vingerke, eine oet Duutsjsland euver gevloage Heino en nog vööl mjiè. ’t Woar weer ein mennekestreffe wie t zich huert, mét vööl sjpas, polonaises, beer, gezelligheid en mansluuj ongerein. Hie mét wil ich dan auch aafsjlete went mörrege (moandig 20 februari) goan veer ’t soaves noa ’t oetreike van ’t Maske in Vallekeberg.

Alaaf

Wederom ein ruig weekend

’t vriedigs d’r 10de februari, prins(es)sezitting in Wahlwiller (Wilder), ein zitting woase dich (veur ós) waans in ’t Mallorca van Sjpanje. Allein ’t waer óntbrook, mér de gezélligheid woar zeer zeker aanwezig, mét leuke artieste en eine lékkere pot beer. D’r daag dernoa, ’t zoaterdigs, móste veer al vreug oet de vaereum noa Mestreech te goan woa veer woare oetgenuedig um op de foto to goan, same mét alle Prinse, Prnsesse en ministers oet ’t heuvelland. ’t Soaves woare veer te gas op de receptie van ’t 6×11 joarig besjtoan van CV de Kleindererre in Segietere, woa zelfs eine jubilaris van 5×11 joar woar, dat woar erg speciaal. Doanoa zint veer mét eine waal hjièl groate groep noa de Webu Prinsezitting in Valkeberg gewaes. Ich kin zégke, dat waer van Mallorca höbbe veer doa waal gehad. Ich hö neet ekerein getéld, mér um doa mét eine groep van Sjin met mjièh es 50 man noa binne te laupegeuf dich waal hinnevél. Veer wólle auch jederein bedank dae mét is gewaes. ’t Zóndigs houwe veer vriè en noa ein riesen weekend is ’t dan auch waal fijn um aeve bie te kinne sjloape, zeker este kieks noa ’t programma van de waek d’r noa. Doareuver d’r volgende kièr mjiè.

Alaaf

Wir ein wiekend vol verrassingen!

Zoa, naa get tentames va mich en get wirkoere van ‘t Anne (want dat geit natuurlijk auch geweun durch) waor ‘t aafgelaupe vriedig weer tied um drop oet te trékke en waal nao cv d’r Vooseschtoets in Ieëpe.
Nao verscheije versjnaperinge en ‘t fillesetre va mede tamboer en prins Maikel 1 en zien prinses waor ‘t veur ôs tied um truugk te kière nao ‘t Waterratte riek, want dao waor ‘t Carnabal in de voetbalkantien (va Sjtröch) al vôl aan de geng.

Wie veer hie in ein lang polonaise nao binne lepe begôs ‘t fiès veur ôs eigelijk vriewaal direk. Mit o.a. optraejes van de Opa’s (aka Oud Prinse Asosjasie), de Geliënde en de Molliemeekersj höbbe veer same mit jeugprins Raiko en zien jeugprinses Skye (en eine hièle haup jeug va Sjin en ein flinke delegasie van de Sjin Romanos) flink polonaise gelaupe, geroeid, gesjprônge en höbbe veer flink sjtaon hakke.

Op e gegaeve moment waor ‘t tied um d’r sjterspeler va sv Geuldal bekind te make, nao ein hièl leuk ineingezat filmpke mit versjillende kandidate die aan ‘t woord kaome woord ich de buun op gerope um d’r Phil van Oers oet te rope tot nuje sjterspeler va sv Geuldal. Hienoa waor ‘t aan d’r dj um nog “effe” gaas te gaeve en ich môt zégke dat höbbe veer auh waal ech gedaon.
Nao e paar uurkes sjlaope en get uurkes vertoeve bie de Hanos kaom ich heim wo de ganse sjtraot flink aan de geng waor mit ‘t versere van ’t hoes en dat höbbe ze sjoan gedaon.
Este noe d’r Breiwaeg inveusj is ‘t eigelik ein lang prinse sjtroat tot aan d’r Kirkplei. ‘t Saoves ginge veer prins Marcel 2 en zien prinses Anita bie CV de Puime i Wielder fillesetere, meh durch e drök programma mit optraejes va o.a. de Shakin’ dj’s, de Geliènde en hièl get carnavalsvereiniginge leep ‘t allemaol get oet. Wie veer truugk kaome i Sjin waor d’r ein wisseling va de prinsenwach wodurch veer i vol ornaat nao d’r verjäördaag va d’r Mark en ‘t Melanie zint kinne gaon.

‘t Zôndes waore veer es prinsepaar oetgenuèdigd um mit e paar sponzore va de Blauw Sjuut mit te gaon nao d’r Sjelmetaore i Haelder, wat de thoesbasis is va de Blauw Sjuut zelf.
Dat waor gans sjoan um mit te make, want doe kins dich neet veursjtélle wieväöl tradisies de Blauw Sjuut eigenlijk waal neet haet. Veer höbbe ein rôndleiding gehad tot baove in d’r toare wo veer ein lés in de gesjiedenis van de vastelaovend, de Blauw Sjuut en Haelder höbbe gehad. Wis deer dat d’r auch Bokkeriejesj gevange höbbe gezaete in de kasjotte baovenin dae taore? Dit waor ein van de väöle leuke weitjes euver d’r Sjelmetaore.
Hienao zin veer same nog eine gaon drinke in Haelder en dáonao zunt veer weer truugk gevare nao Sjin.

Noe wir get biesjlaope en volgende waek wir volle gaas!

Alaaf

Foto’s: Rob Kessels

Facebook

Kalender

  1. Carnevalszondig

    11 februari 2018
  2. Carnevalsmaondig

    12 februari 2018
  3. Carnevalsdinsdig

    13 februari 2018
  4. Essjelegoonsdig

    14 februari 2018