D’r Sjinse vastelaovestrein dentert nao twiè waeke prinsesjap al op vol toere! Aafgelaupe wiekend zunt veer in 4 daag merleefs 6 kièr oetgetrokke en dat zal de kommende waeke allein nog mer miè waere.

Veer begóste ‘t wiekend al op donderdigaovend toen veer durch Roel en Nancy oetgenuèdigd waore veur de onthölling van d’r nuuje Vallekebergse vastelaovesposter. Dit jaor is dae gemak durch Marjan Vleugels oet Sub en  t rizzeltaat maog  wir zeenwaere ! Het is eine kleurrieke en blieje poster gewore dae ónderhand al bie òs aan de roet hingk. D’r aovend woort compleet gemak mit optraejes van Ken & Bob en oos eigen Sjinse Oud Prinse. Al mit al eine super sjtart van ’t wiekend!

D’r vriedig vertrok de taxibus mit e good gezelsjap richting Ieëpe wo veer Prins Wim III en Minister Freddy & Jeugdprins Timo en Jeugdminister Niek van der Vooseschtoets mochte fillesetere. Daonao mooste veer wir sjnel door want d’r Voetbalaovend van SV Geuldal waor al in volle gang. In ’t Wielderhoes höbbe veer samen mit alle hoagheden van Sjin en Wielder d’r eine geweldige aovend van gemak. Versjeioe artieste oet alletwiè de dörpe betraoje de bühn en es klapper zatte Spik & Span es aafsjleting d’r zaal nog ins duchtig op d’r kop. SV Geuldal: Bedank!

Nao röstig bie te zeen gekómme op zaoterdigmörge sjting rond 2 oer de prinsenwach alwir aan de deur. Veer mochte wir nao Leeuw aan de Brug gaon um veur TV Vallekeberg opnames te gaon make in het Vastelaoveskaffee. Roel en Nancy sjtélde òs dao e paar vraoge en zatte mich toen auch nog ins aan het werk es cameraman. Leuk is dat um alle prinsen, prinsessen, ministers en eine hofnar van de ganse gemeinte in dae middig taege te kómme! Veer höbbe ós dao dan auch gezellig nog e paar beerkes gedrónke veurdat veer alwir door nao de volgende activiteit mooste. Dat waor de prinsenzitting in Bemelen. In e sjtampvol gemeinssjapshoes zoge veer Prinses Angelique oetgerope weare es heerster euver het Berggeitteriek. Voldaon vertrókke veer laat op d’r aovend wir richting Sjin.

Want het wiekend hauw nog eine daag: d’r zóndig. Eine biezondere daag! In alle vreugte vertrokke veer nao het Winkbülleriek wo veer waore oetgenuèdigd in d’r Sjelmetaore van de Blauw Sjuut. Samen mit Sjuut-sjponzore Marco Leunissen en Karel Keulen höbbe veer dao ein rondleiding gekrege en höb veer d'r eine gezellige middig van gemak. Hiè onger zeet d’r get foto’s die dao gemak zunt! Marco en Karel: hartsjtikke bedank veur dizze biezóndere middig! Einmaol klaor in Heële vertrok d’r taxi nao Kunder, wo veer tradisjoneel òs felicitaties euverbrachte aan d’r nuje prins van de Kaatboere: Prins Harrie. En auch dao höb veer ós richtig good geammezeerd!

Muj meh bepak mit sjieke verhaole vertrokke veer toen nog nao d’r Proemehook wo veer bie John en Sonja ’t wiekend lekker höbbe aafgesjlaote.

Noe oetröste en alvast veurbereide op ‘t kómmend wiekend: mit ónger angere d’r Sjpaarclubaovend!