Alwir is e wiekend es prinsenpaar umgevlaoge. Juus wie vurrige waek ginge veer 4 daag op pad en makde veer eine haup sjpas en plezeer.

Ver begóste aafgelaupe dónderdig mit e hepke aete bie Henk en Roos. V’r waore namelijk door de auwesj van Prinses Sanne I en Minister Fleur oetgenuèdigd veur eine gezellig aovend zónger carnavalskleier. V’r höbbe ós good geammezeerd, hartsjtikke bedank!

D’r daag daonao sjting de prinsenwach wir aan de deur um oet te traeje. Dizze kièr nao Wahlwiller (Wilder) wo de Boemelaire hun nuuj prinses Wilma proclameerde. Mit behuèrlik väöl gastvereinigingen höbbe veer semmelig get metersj polonaise gelaupe en flink gesjoenkeld.

Natuurlik waor ‘t opsjtaon d’r daag daonao get lestiger, meh d’r kemau kaom al sjnel truugk wie veer väöl luuj in oze tuin zoge klusse. De buurt kaom d’r prinsentempel namelijk sere! Zoa rónd de klok van 4 waor ’t rizzeltaat vaerdig en keke veer ós auge oet. Het is super sjiek gewore! Via deze waeg wille veer dan auch ekereine hartsjtikke bedanke dae mit haet gehólpe!! De komplimente sjtruime noe binne, zelfs eine wéthouwer van de gemeinte haet ós dat laote weite.

’t Saoves vertrókke v’r richting Houthem wo veer Prins Raoul I van de Boschrave ginge fillesetere op zien resepsie. Jaomer genóg kóste veer neet al te lang blieve want in A ge Pannes sjting d’r Sjpaarclubaovend op ‘t programma. En ja wat mót ich vertélle euver d’r Sjpaarclubaovend… Tösje al die tokkies höb ver gelache, gedanst, gezónge en hièl väöl sjpass gehad! Mit Prins Stijn I veurop en De Geliënde op de bühn kint dat eigenlijk auch neet angesj. Eine aovend um in te lieste!

En dan tot sjlot d’r lètste daag van ‘t wiekend: de resepsie van de Öss oet Ees. Dao zjweije dit jaor Jubileumprins Léon en Jubileumprinses Maria d’r scepter. Op dat feit höb veer ós dan auch op d’r zóndigmiddig e aantal beerkes gedrónke en voldaon wir nao Sjin vertrókke, wo veer bie d’r Wim en ’t Ans nog eine kièr gezellig ‘t wiekend door kóste numme.

Nog e paar daag wirke en dan gunt veer beginne aan d’r marathon! Vanaaf kómmende vriedig tot aan carnavalsdinsdig maoge veer ekere daag ós prinsenpak en prinsessekleid aandoon.

Veer höbbe zin d’r in!

Trouwen, höb deer uch al ingesjreve veur d’r Sjinse Optoch? En höb deer uch al aagemeld veur d’r vernuujde Katerlunch op d’r carnavalsdinsdig?

Nae?

Meld dich dan hiè aan veur d’r optoch.

En laes hiè miè euver d’r nuje Katerlunch.