De ièsjte proclamasie

In jannewari 1952 nao 'n rippetiesje van 't zangkoear Inter Nos in 't cafe van d'r Piet van Weersch is dao 't idee ontsjtange um 'n karnavalsvereiniging op te richte. Umdat in 't dorp mit vastelaovend noeats get te doon waor, waor ekerein al direk hiemit inversjange.

Dae ièsjte Raod van Elf besjtông gedeiltelik oet lede van Inte Nos mit aanvölling van anger carnavalsleefhöbbersj.

D'r Cor Claessens kreeg al dadelek de functie van prezident aangesjmeerd (umdat he 't bèste moelle kôs.)

D'r ièsjte Raod besjtong dus oet d'r Cor Claessens, Sjeng Rocks, Winand Geelen, Martin Weerts, Victor Huydts, Harrie Defauwes, Wiel Beckers, Hub Knubben, Juup Bertrand, Hub Reneerkens en d'r Loui Pasmans.

't Probleem waor natuurlik um enne prins te vinge, mèh nao väöl gelammenteer wiste ze toch eindelik d'r Fer Huntjes euver te haole. D'r Fer waor eine boerevriegezel en me ging d'r van oet, dat hae waal e paar gölle misse kôs, want dao kaome natuurlik ouch nog onkoste bie kieke, zowie 't prinsepeksjke dat hae oet eige tesj betale môs en daobie leefs nog de nuèdige consumpties (veur d'r raod) De prinseproclamasie zou plaatsjvinge in 't cafe van 't Marie Bosch op d'r Vinkeberg.

E paar daag van teveure woort nog gauw door d'r Pierre Siepers, d'r Hub Boon en d'r Jan Siepers ènne sjlager inein gesjteeld wovan jaomergenog allein de lètste paar reigele in de herinnering zint blieve hange, n.l:

.....Dan huèrste van oet Sjtröch tot in d'r Graaf

.....Alaaf alaaf alaaf....

Väöl langer waor et muzikale produk zoea wie zoea al neet, want dao waor geine tied veur, 't mos jao auch nog door d'r Eleveraod gelieërd waere. Twiè daag veur de proclamatie waor 't saoves de generale repetiesje.

Et hoesorkes besjtong oet d'r: Jan Siepers(accordeon), d'r Frits Rijken(saxofoon) en d'r Harrie Caubo(drum). Naodat 'tt orkes en de componisten et muzieksjtök versjillende kieër veur gesjpeeld en gezonge hauwe, probeerde d'r Raod van Elf vanaaf e papierke met d'r teks d' sjlager zoea good meugelek mi te zinge. Umdat in dae tied nog gein sjpraoke waor van 'n geluidsinstallatie, mos zoea hèl meugelik gezonge waere.(zoea wie 't zich aanhoort belaofde 't op veurhand al geine topsjlager te waere) 't orkes kreeg oug nog van 't Marie Bosch de waarsjuwing, dao moch op d'r proclamatieaovend allein: Wals, Ingelsjewals, Marschmuziek en Tango gesjpeeld waere,want get anges biev.. foxtrot vông 't Marie mer wille en moderne kraom, dao môs't nieks van höbbe

En doe waor d'r groeate daag aangebraoke.

't Cafe waor verseerd, e podium opgeboewd mit op d'r achtergrond e groeat rattenis van papier en auw loemele.(juus ech) Op ziej dao van sjtong eine mit gekleurd papier verseerde sjokkelsjtool bedoeld és zetel veur ziene hoeaglustigheid Al gauw waor d'r zaal gevöld mit publiek, 't orkes sjpeelde zich ondertösje in d'r zweit um de sjtumming drin te kriege. Nao dat 't gedöld van ekerein in d'r zaal lang genôg op d'r proof gesjteld waor, marsjeerde dan eindelik ônger daverend applaus en buuttemarsj d'r Raod van Elf mit prezident Cor nao binne, gans sjiek aangedaon mit mutsj, zwart kostuum en sjerp. Mit väöl gesjravel woort zich op de bühn geïnstalleerd.

Sjrieëwend baove 't kabaal oet heel d'r Cor zien äöpeningswoord en mit e driemaol alaaf makde d'r Raod d'r karnavalsgroet. (dao hawwe ze van teveure good op geoefend en urges vanaaf gekeke) Natuurlik môs auch d'r sjlager gepresenteerd waere aan de aanwezige in d'r zaal, mèh dat woort, woo me van te veure al bang veur waor, eine reigelrechte aafgank; dat kaom umdat de hèlf van de Raodslede 't papierke vergaete hauwe en de angere wiste neet miè wie 't leedje auch alweer gông.

Um sjuus èlf oer gonge de lampe gedeiltelek oet in d'r zaal (alle lampe oet doon dat moch neet van et Marie, want me wis mer noeats mit dat jonk volk in d'r duuster) 't Rattenis woort fél besjene, Prezident Cor, d'r Raod van Elf en 't publiek sjrieëvde zich de longe oet 't lief mit väöl alaafs en op hand en voot kaom oet 't rattenis d'r nuuje prins gekrope. (dae waor bliej dat hae droet waor, want dae erme jong hauw vanaaf et begin van d'rr aovend opgevauwe in dat nis gezaete)

Natuurlek woort hae ièjs door d'r president aan 't publiek veurgesjtèld.

Nao de offisjiele aankleiïng mit mutsj, mentelke en prinsesjtaaf, loos d'r Fer de proclamasie veur, kreeg d'r titel es Prins Fer d'r Ièsjte en waor vanaaf dat moment d'r heersjer euver 't Waterratteriek. D'r verseerde sjokkelsjtool woort nao veur gesjove, mèh wie d'r Prins zich groeatmechtig in dae sjtool wôl zètte, kaom 't ongelökkig moment dat get good verkieërd ging. Umdat hae op d'r rand van d'r sjtool ging ziete, kiepde d'r sjoean verseerde sjtool mit d'r Prins nao veur en twiè seconde later laog ziene hoeaglöstigheid onder d'r sjokkelsjtool veur de bühn.

D'r Fer dae toch al zoean hoeag sjtum hauw, piepde gans toepasselik van d'r sjrik wie ein echte waterrat. 't Publiek in d'r zaal sjtông op de sjteul um mer nieks te misse, die brulde en loge kromp van 't lache.

Sjnel woort d'r Prins ônger d'r sjtool oet gehaold en veurzichtig op 't podium in d'r zetel gehôlpe. Nao dat onveurzene oponthaut gông 't programma wiejer.

Umdat ze geine buutnereedner hauwe vertelde d'r Cor zelf mer e paar wietse, want d'r aovend môs jao op ein of ander meneer zo goot meugelek gevöld waere. Wie de rés of d'r inhawd van de proclamatieaovend wiejer gong en verleep, is neet miè te achterhaole.

Daag lang nao die proclamatie woort in et ratteriek nog gelache euver d'r Prins dae wat me zoea neumt: D'r zaal plat kreeg !! Ei dink waor in ekergeval zeker:

Sjin hauw 'n carnavalsvereiniging en eine Prins Carnaval.

De mujte waerd um te vertelle is misjien nog 't volgende;

't Orkes mos bie d'r Ber Bemelmans van 't cafe De Duif a ge Pannes 'n afsjpraak gaon make veur de Prinsebal. Dat Prinsebal is jaomergenog neet doorgegange, d'r pries van fl 22.50 (fl 7.50 per man) wat 't orkes zich vroog, wool d'r Ber neet betale , want dat vong hae toch waal te duur, hae waor neet van zinnes zich in de onkoste te sjtaeke. .

"j.s."