Op zaoterdig 7 jannewari 2012 woort op camping Vinkenhof Frank Claessens oetgerope en geinstalleerd es Prins Frank I, d’r nuuje heersjer euver ‘t Waterratteriek va Sjin en umgaeving. Um hem gèt baeter te lière kinne volg hie get informasie:

1. Prins Frank I woort 41 jaor gelijje, op 18 maart, gebaore in ’t oud ziekehoes in Haelder

2. Prins Frank I is geneump nao d’r achternaam van ziene Pap, namelik Claessens

3. Prins Frank I is opgegrujd in Mechele, same mit d’r Pap, de Mam, 3 breurs en 2 zusters. Hae is d’r jóngste

4. Noa de basissjoeaal is Prins Frank I veur bekker gaon lière, dat beroep haat hae 23 jaor oetgeoefend

5. Op zien 16e hat Prins Frank I ’t Sandra lière kinne. Zie is opgegrujd in Klumme, Barrier, in de fietsezaak van d’r Pap, later d’r antiekwinkel van de Mam. Daorum is d’r altied d’r wunsj gewaes um ein eige zaak te beginne

6. Prins Frank I is mit ‘t Sandra getrouwd in 1993

7. In 1991 höbbe ze e bekind hoes gególle, dat van d’r dieke Frens

8. Prins Frank I en Prinses Sandra höbbe 2 kinger, d’r Kenny en ‘t Jessica

9. In 2001 hat ’t Sandra d’r kadowinkel Impressions gesjtart. Door wat se same veur de Carnaval bedach en gemak höbbe is Prins Frank I in de reclamewaereld terech gekómme. Sinds 2011 runne ze de zaak same, het in de kado artikele en hae in de belèttering en vinsterverseringe.

10. Prins Frank I is bie de veterane van de Sjtröchter Boys, wo hae mit väöl plezeer de ièstje, twiède en veural auch de driede hèlf mit maog doon

11. Prins Frank I is lid van d’r sjpaarclub in A ge Pannes, want veur Carnaval kinste noats genóg sjpare

Veer, prins Frank d’r iersjte, ballewaerder en later knaoketrapper van de veterane va Sjtröch, zeutebruèdjesbekker ièsjte klas, PR man pur sang, geine mak toch gein baetere reclameborde dan ich zelf, Lètter en Sjtickerkeuning va Sjin

Make biegesjtange door President Dave, same mit d’r Wieze Road de noe kómmende elf reigele bekind:

ten 11e: Dat ich dit jaor same mit ’t Sandra euver Sjin zal regere ónger ’t motto: Lègk de sjtickersj en prullaria mer in de kas, want mit Carnaval make veer allein mer Sjpas.

ten 10e: Dat in ’t Kirkeblaedje kump te sjtaon: Hulp veur in der winkel gezóch! Want vanaaf noe goesj ich mich ins gans in d’r boch!

ten 9e: Dat de prinsewach ’t dit joar zjwoear kriet, want wat de meiste neet weite is dat ich es oud bekker mer e paar oere sjlaop per nach nuèdig höb.

ten 8e: Dat d’r carnavalsgroep wo ich dit jaor mit zou gaon eine minder Sjieke wage maog boewe, umdat ich toch hoag op d’r Prinsewage euver Sjin oet kiek.

ten 7e: Dat ich ’n tapvergunning höb aangevraog veur de drie dol daag, um D’r Dieke Frens veur e paar daag in ière te hersjtèlle!

ten 6e: Dat ich noe eindelijk ins heim d'r gene bin dae es lètste heim kump. Normaal sjlete de kinger altied es lètste de deur

ten 5e: Dat de gemeinte weer eine drempel veur mien hoes mak, zoa dat de luuj ónger ’t vare op hun gemaak nao ozze prinsetempel kinne kieke.

ten 4e: Dat ich neet allein T-shirts blief bedrökke, meh dat ich vanaaf noe auch ’n eige kledinglijn krieg, zoadat de Waterratte ouch nao 't carnavalsseizoen d’r sjiek bie laupe.

ten 3e: Dat Sjpaarclub A ge Pannes auch dit jaor bewies ènne echte hofleveranceer veur de Sjinse Prinse van de Waterratte te zeen.

ten 2e: Dat ich volgend jaor precies 2x11 jaor in Sjin woon, ’t Sandra dan bienao 4x11 weurd, ich op e jaor nao auch! Wiezoa, de carnaval ziet mich neet in ’t blood?

ten 1e: Dat ich dit jaor neet allein regeer euver het Waterratteriek, meh auch euver ’t Hane en Hinneriek, zoadat miene haan zich auch ins un paar waeke kint oet sjlaope.

Ten letste: Dat met de sjoan dinger van vreuger, en de Sjtickeraers en veterane van huuj, der Sjinse vasteloavend zal blieve veur al ós luuj. Blief allemaol d'r Sjinse vastelaovend viere van oet eur hart, dan blief d’r Sjinse carnaval ummer apart!

Gegaeve i Sjin op 7 jannewari 2012 Prins Frank der 1e van de Waterratte, biegesjtange door President Dave en d'r Wieze Road

ALAAF!!!!!!!!!