Zaoterdig 7 jannewarie

Geplaatst op zaterdag 14 januari 2012.

D’r daag van de proclamatie waor aangebraoke en ich mót zegke dat ich van richtige nerve nog geine las hauw, ’n lichte sjpanning waal, meh dat waor al maonde zoa.
Veer hauwe e gans plan bedach, same mit d’r Ad, Huub en d’r Dave zoadat veer zeker d’r van waore dat oos vrung en femilie auch bie dees proclamatie aanwezig kóste zeen.
Dat verleep allemaol good, totdat d’r Ad mich saoves um kwart op neuge belde…
Dat waor ’t teike dat ich het op oos äöpening van de nuuj zaak i Klumme aan oos femilie en vrung mós gaon vertèlle…mie hart sjloog waal 11 kièr euver, dink ich.
’t Feit dat mien auwesj en zelfs mien kinger ’t neet wiste waor hièl erg leuk en zeker ein verrassjing veur hun.
Op ’t zelfde moment kaom d’r Ad en d’r Huub bie ós i Klumme nao binne mit ’t bewies dat ’t ech woear waor, namelik ’t sjpandook dat noe baove oos veurdeur hink.
Ich nog effe d’r bie vertèlle dat ózze zoon d’r Kenny neet i Klumme waor meh same mit hièl väöl belangsjtèllende luuj bie Vinkenhof in d’r zaal sjtong en nog ummer nieks wis.
Vanaaf dat moment geit alles wie in eine film hièl flot veurbie.
Nao Vinkenhof gaon, umkleie baove d’r zaal en klaor gaon sjtaon veurdat ’t groate moment dao is.
’t Moment daste dan oetgerope weusj en same mit ’t Sandra toegejucht weusj door de väöle aanwezige is get dat veer zeker noats miè zulle vergaete.
Aan alle luuj die dao waore wille veer dan auch hièl erg bedake.
Wat dan volg is daste es Prins aagekleid weusj durch Oud Prins Jan aan wae ich nog dank wil zègke veur ’t prachtig sezoen en de sjoan wunsje die hae in zie weblog aan ons richde.
Nao dit alles volgde eine fantastiese aovend mit plezeer, hièl sjoan reaksies en de ièsjte fillesetasies
Veer wille bie deze jekerein dae dao waor bedanke, meh toch auch effe d’r Huub, d’r Dave en d’r Ad die ’t meugelik gemak höbbe dat veer dao mochte sjtaon en d’r sjoane aovend georganiseerd höbbe.
Veur ich aafsjleet wil ich auch jekerein bedanke die ós via ’t gastebook perseunlik of via welke waae auch gefilleseteerd höbbe.

Dank dank dank
Alaaaaaf
Prins Frank1 en Prinses Sandra