Veer woorte opgehaold door d’r prezident en d’r veurzitter en zint same mit oos femilie en vrung nao ’t Geboew gegange.
Volges plenning waor d’r ièrsj e samezeen mit de ganze CV.
Veer höbbe dao oos femilie en vrung aan hun maoge veursjtèlle en dees decorere.
’n Anger belangriek dingk dat daonao gebeurde waor dat ‘De Lachende Waterrat’ oetgereik woort. Dees óndersjeiding is mèr veur wiènige weggelag en sjpeciaal bedoeld veur luuj die belangriek zint veur en binne de CV.
Dees óndersjeiding ging nao alle dames van d’r Raod van Ellef, die es sjteun altied achter de manne van de CV sjtunt.
Dames va harte profisiat!
Nao e lekker sjtöksjke vla en ’n tas koffie waor ’t al sjnel zoa wiet dat de resepsie begós.
’t Sandra en ich höbbe noats durve druime dat t’r zoa väöl luuj nao oos resepsie zouwe kómme.
Leef luuj, ’t waor óntzettend hartverwermend en ónvergaetelik… ech hartelik dank veur 1) ’t aanwezig zeen en 2) veur de väöle gifte die veer mochte óntvange.
Aansjletend aan de resepsie begós e geweldig fiès woo gelökkig nog väöl luuj aan mit gedaon höbbe.
’t Feit dat veer van de kinger ’n optrae van d’r Jordi Swillens kado krege waor ech get wat veer neet verwach hawwe en hièl erg van genote höbbe.
Kenny, Jessice en Angelo hartelik dank veur dit geweldig kado.
Door de sjtumming die door d’r Jordi gebrach woort en door DJ Tom euvergenómme woort, waor ’t nog hièl lang gezellig.
Taege 10.00 oer zint veer richting Mieke en Zef gegange óm nog effe get pilskes te happe en nog e paar km polonaize te loupe.
Super leuk en veur veer ’t wiste waor ’t al sjnel 02.00 oer.
De prinsewach (D’r Dave en d’r Huub) en d’r Glenn höbbe mich toen nao heim gebrach.
Door ’t feit dat ’t Sandra al ièrder door d’r Willie nao heim waor gebrach, móste de manne toch effe mit nao binne óm mich oet ’t prinsepak te helpe.
Dat bleek veur hun lestiger dan verwach. Naodat ze zeker 20 minute óm mich heen hawwe gedrièd mit hun drieje waor ’t eindelik gelök en kóste veer effe röstig gaon ziete en geneete van ’t welverdeende drenksjke.
Ich höb de manne e lekker glaeske Corenwijn veurgezat wo ze neet allein tijdes ’t drinke d’r van plezeer höbbe gehad. D’r waeg veur hun nao heim woort 3 kièr zoa langk es verwach…

’t Waor eine top daag en e geweldig weekend.

Alaaf,
Prins Frank I en Prinses Sandra.