Wegens ein drukfout in ’t carnavalsbeukske sjting ’t bedank weurdje van oud-prins Henk I neet volledig der in.

Um toch eekereine te kinne bedanken publiceren veer ’t dit keer op de website:

Noeats gedach Prins te waere

Tot ’t moment dao waor dat d’r Ad ’t Roos polsde of ich dao aope veur zou sjtaon.

Wie ’t Roos mich dat vertélde wis ich neet wat ich huèrde: ich es Prins?
Ich versjrók mich en d’r mónd veel mich aope: jazeker wil ich Prins waere!

Later vool bie de hélf van ’t dorp auch d’r mónd aope: d’r Henk Prins?

Get later volgde de ièsjte aafspraoke, in vraem café’s in vraem dörpkes. Meh zoa kumpste waal nog ins urges.

Wie veer ginge kieke veur eine prinsesjteek höb ich metein auch al mie pak oetgezóch. Ik waor metein verkoch en wól nieks angesj miè.  De prinsekeuzecommissie lachde allein mer en ich wis dat ’t good waor.

Toen waor ’t de beurt aan Prinses Roos um e biepassend kleid oet te zeuke.
Daonao waor ’t tied um de foto’s te make en dan zuuste dich veur d’r ièsjte kièr in vol ornaat. Ich mot zègke dat ’t dan waal ech begint te kriebele.

De proclamatie waor eine super aovend. Veer kaome bie ós  biejein mit d’r groep wo veer al jaore mit nao ’t oetrope gunt. Ich zoot nog get tillevisie te kieke wie ein zag: “ zoea eine meuge kint gaar geine Prins waere”. Ich dach bie michzelf: “good zoea, die weite van nieks”

Wie  v’r einmaol in ’t Geboew waore höbbe veer lekker get pilskes gedrónke en op e gegaeve moment begós ’t Roos nerveus te waere.

De  bekinde dia’s begóste en de aafsjpraok waor dat ik bie ein bepaalde foto ónger ’t dook durch zou kroepe. Jekerein keek toch in de lóch nao de dia’s dus dat zou neet opvalle. Ich hoort de luuj eine haup name van kandidate rope.
Ich heel ’t neet miè en zag taege d’r Ad: “tot dae Huub nao de pómp löp, ich gaon al”.  Dus kaom ich ein foto of drie te vreug durch ’t dook gesjprónge, e geweldig geveul!!! En d’r Huub keek wie eine boetsauto.

Veer woorte durch d’r zaal geweldig óntvange en dat goof ós e hièl good geveul.

’t Woort eine geweldige aovend en ich ging mit eine zjwaore kop nao bèd en sjmörreges sjtöng de prinsewach al um 10 oeraan de deur. Veer gónge al vreug nao ’t Geboew veur de intern resepsie. Die woort gevolg durch ein waanzinnig sjieke resepsie van mer leefst 7 oere lank.
De sjoanste oetsjpraok kaom van d’r Gerrit van Wissen: “Henk, doe höbs vrund en vijand verrasjt”

Wiejer waor dao e optraeje van jeugraod van de Winkbülle oet Haelder en daonao de binnekóms van de Brander Stiere oet Aoke.

De daag vloge veurbie en veer gónge van ’t ein sjiek moment nao ’t angert. ’t Bezeuk aan d’r Sjelmetaore van de Blauw Sjuut, ’t konzaer van de fanfaar, de galazitting, de auw wieverbal, d’r voetbalclub en neum mer op. Allemaol geweldige belaevenisse.
Toch wil ich d’r 2 oethaole en dat waor de óntvangs van de Blauw Sjuut op d’r dinsdigaovend en d’r sjpaarklupaovend bie ós. Este dan es Prins binnekums mit 20 patsje achter dich aan dan biste zoa gruèts wie eine aap.

Natuurlik wil ich auch neet de jeugzitting vergaete wo ’t nuuj jeugprinsepaar Prins Chris en Prinses Esther woorte oetgerope. Wat hauwe die energie!
Veer höbbe same mit hun e geweldig sezoen gehad.

E groat komplemint aan de buurt die zich prima hauwe samegepak en d’r café va boete geweldig geseerd hauwe.

En dan kump d’r Prinsewage veurrieje. Eine wage wooste altied nao gekeke höbse en wooste noe mit dien Prinses op maog gaon sjtaon. Wat e geweldig geveul!  Vanaaf d’r Prinsewage d’r optoch kieke waor sjiek en este dan langs d’r eige café trèkst dan biste zoa gruèts daste d’r  Prins bis.

Op d’r dinsdig dan ’t aafsjiedswoord, natuurlik mit ein traon meh waal op de auw meneer achter d’r auto aan ónger de noeate van’t leedje  Auf wiedersehen nao de Geulbrögk.  En dao sjtóng ein ièrehaag va luuj die dich bedanke en knoevele. Geweldig.

Wiejer wil ich d’r Raod va Elf bedanke veur hunne sjteun tiedens alle activiteite die d’r gewaes zunt en dat waore d’r nogal get. Top manne!!

E sjpesiaal woord van dank aan d’r Prezident Dave dae mich euveral veur de vol 100 procent hat biegesjtange en alles veur mich reigelde zoadat  ich ’t richtig nao miene zin hauw.

Meh dit alles hauwe Roos en  ich neet kinne doon es veer gein hulp gehad hauwe um de zaak aope te haute es veer wir ins op sjiep ginge:
RON, VIVIANNE, NIELS, ZOË, CHRIS, RON, KYLIE, ANS, FRANCIEN EN JOLANDA danke!

Zoa kin deer zeen daste zónder hulp neet wied kumps en zoa is ´t auch mit carnaval viere. Es Prins en Prinses hòbste ´t gans dörp nuèdig um e geweldig carnavalssezoen te höbbe.

Daorum wil ich de prinsekeuzecommisie bedanke dat ze mich gekaoze höbbe, Roos en ich höbbe eine geweldige tied gehad.

D’r nuuje Prins wunsj ich auch zoa e leuk sezoen es wie  ich mit Roos gehad höb, dan weit ich zeker dat hae e hièl leuk sezoen geit kriege.

.

PRINS HENK 1