Väöl luuj ziete nog neet in de vastelaovessfere en höbbe 't road, gael en greun nog op d'r zölder liegke. Bie ós is dat natuurlik effe angesj! Al 't ganse jaor genete veer van 't prinsesjap en euveral wo v’r kómme waere veer d'r waal op de ein of anger maneer aan herrinerd, al is 't het aansjpraeke van prins of prinses op 't werk, 't kadootje 'oetpakken' door mit vrung nao Paries te gaon of ‘t taegekómme van anger hoaglustighede oet d’r regio: veer veule ós 't ganse jaor 't prinsepaar!

't Waor dan auch aaftèlle veurdat veer ós peksjkes wir aan mochte doon: veur 't ièsj moch dat - nog zónger sjteek, medailles en scepter - op 3 november veur de 10de edisie van 't Buuttetreffen in Walem. Eine gezellige aovend wo veer ós traone gelache höbbe! Mit de crème de la crème van de Limburgse en Brabantse buuttewaereld haet de organisasie wir get sjieks neergezat... en dat belaof get veur volgend jaor: de 11de editie!

Ein waek later waor ‘t dan éch zoa wied: d’r 11de van d’r 11de! Um precies 11:11 höbbe veer de rat oet de Geul gehaold en waor de Sjinse vastelaovend offisjeel geäöpend. D’r kroegetoch dae dao op volgde waor sumpelweg mega gezellig! Mit e groat gezelsjap höbbe veer de carnaval verkondigd in 't Graefke, d'r Proemehook en in A ge Pannes. Zelfs ein klein delegasie Mirlitophile oet Vallekeberg heij zich de wandelsjeun aangedoon en kwaom langs um gezellig eine te drinke, sjiek! 't waor wir begós!

D’r trein denderde eigelik wir durch van wo hae op d’r carnavalsdinsdig gesjtopt waor. Ièsjte activiteit boete 't dörp: de 6x11 jäörige resepsie van de Öss oet Ees. Nao ein sjnel fillesetasie ginge veer durch nao Vallekeberg wo de Sjinse Oud Prinse mitdoge aan de Sjlagerverkezing. Mit sukses! Nao eine sjpannende sjtried wónne de manne veur 't twiède jaor op ‘n riej.. Toch waal sjpeciaal um dat es prinsenpaar te maoge mitmake!

D'r daag daonao (d'r zaoterdig) mochte v'r wir op pad. Dizze kièr góng de bös richting 't riek van de Puime: Wielder. Dao woord aafsjied genómme van prins Noud, prinses Rowan en minister Rob en woorte de nuuje heersjers oetgerope. Veer ginge dao neet allein heen: veer noome Jeugprinses Sanne en Minister Fleur namelik gezellig mit! Nao get polonaises gerend te höbbe krege veer echter eine dómper. Wat eine leuke aovend hauw mótte waere eindigde jaomergenóg al rond 22:00 oer mit ein truugkrit nao ozze prinsetempel: Heim! Ein flinke boekgriep bie d'r prins goesjde root in 't aete. Toch gong d’r aovend allich auch zonder ós durch en proclameerde de Puime Prins Huub I, Prinses Sonja en Minister René. Via deze waeg wille veer hun dan auch va harte fillesetere!

Nao ein waek oetröste waor d'r prins gelökkig op d’r vriedigaovend wir genóg hersjteld um 't vol program te sjtarte. De grens woord euvergesjtaoke en in 's Gravenvoeren bezóchte veer 't prinsenbal van Prins Geert van KV de Waggelerre. Mit eine groate groep höbbe veer mennige polonaisemetersj gemak, väöl leedjes gezónge en eine haup sjpass gehad! Eine aovend dae veer neet sjnel zulle vergaete!

Vervolgens begóste veer aan twiè tripjes richting 't Boschraveriek van Houthem. Tiedens het 6x11-jaorig jubileumwiekend bezóchte veer ièsj de zitting op zaoterdig en op d’r zóndig de resepsie. Op d’r zaoterdig nómme veer ièsj aafsjied van Prins Raoul I en verwelkómde veer mit väöl sjpektakel jubileumprins Ton I. Vervolges ontkaetende zich wir eine groate gekke bende en höb veer ós wir geweldig geammezeerd! Tiedens ein ontzettend good programma - mit onder andere Domm en Dööl, de Geliènde, de Knöppele en nog väöl mié - höbbe veer wir flink get metersj gemak. Auch ós jeugdprinsenpaar waor wir mit en haet van d’r ganse aovend genaote! Veer sjtunt zelfs same mit die twiè oet Kelmis op de foto!

D’r daag daonao höb veer dit nog uns sjtillekes euver gedaon en kóste veer, get röstiger, ós fillesetasies euverbringe aan d’r veesje jubileumprins en aan de ganse vereiniging mit hunne jubilaris. Daonao kóste veer nog ins röstig truugk kieke op 't wiekend ónger 't genot van e hepke en e drenksjke bie A ge Pannes.

't Woord ós dèks gevraog ‘t aafgelaupe wiekend: zeet d'r 't nog neet muj? Meh ós antwoord waor unaniem en sjteevas: nae! Dizze maond liegk esof 't un moetje is meh veer höbbe 't ervaren es de keesj op d’r kook! Nog e paar kièr mit de hière en dames van de Waterratte op sjtap en nog ein paar kièr genete van 't prinsensjap. D’r aafgelaupe maond höbbe veer kinne ervare dat se prins en prinses neet veur e paar maond bis, meh e gans jaor!

Noe begint 't lankzaam richting de Kaesjmis te gaon en dat beteikent dat auch 5 jannewari neet mié wied weg is. Veur ós eine datum wo veer lever nog neet aan dinke; meh veur eine (of mièrdere) in Sjin eine daag wo er/ze al maonde nao oetkiek(e). Oze opvolger(s) sjteit vas en zeker te trappele um zich bekind te make en veer zunt dan auch grellig benuujd! Geneet nog effe van de anonimiteit en bereid dich good veur op ein ervaring die se noats zuls vergaete. Veer kieke d'r nao oet um dich/uch de hand te sjödde!

Leef luuj van Sjin: tot 5 jannewarie in 't Geboew!