’t Begint hièl langzaam allenej te wénne, dat ‘prins en prinses’ zeen. Bie eker fillesetasie sjtraole veer nog e sjtöksjke fossjer, en die fillesetasies höbbe veer de aafgelaupe waek ontzettend väöl gekrege! Van luuj op ’t werk tot de ganse buurt en van de femilie tot auw sjoalvrung: jekeriein wunsjt ós e super sezoen en geuf ós e kompliment veur de sjoan foto. Veer kriege allemoal verhaole wie vewónderd de luuj waore wie ze òs durch‘t dook zoge sjpringe, oos foto op Facebook langs zoog kómme of ’t nuujts hoorte. Jeker verhaol höb veer mit väöl sjpass mäöge aanhuère en veer danke jekerein dae ós dees waek hat verrasjt!

Die waek die vloog um. V’r begóste mit ‘t make van ein foto same mit Jeugprinses Sanne I en Minister Fleur. D’r Roel hat ós good op de geveelige plaat gezat en ‘t rizzeltaat vinge veer geweldig! Veer zunt dan auch gruètsj uch de foto's te kinne prizzentere!

Vervolges kóste veer gaon aaftélle nao ’t wiekend. Dat begós vriedig mit de resepsie van ós jeugdprinsessenpaar. Väöl luuj waore gekómme om hun te fillesetere: ram sjiek! Nao die resepsie höb v’r nog flink get polonaises gelaupe en daonao zunt veer nog wiejer gegange nao ’t Graefke, wo veer de prinsenfoto höbbe euverhandigd en vervolgens nog tot de late uurkes ‘t gezellig höbbe gehad! Op zaoterdig sjtapde v’r veur ’t ièsj de bös in um boete gedörp aan te traeje. In Vallekeberg mochte veer Prins Paul I en Minister Michel fillesetere mit hun proklamasie. Op ‘n geweldige lokasie deep ónger d’r grónd heelte zie hun resepsie. Nao e paar beerkes ginge veer wiejer de sjtroate van Vallekeberg onveilig te maken. Eine gezellige aovend volgde wo veer versjillende sjponsore van oos vereiniging ièrde mit e bezeuk!

En toen kaom d’r daag wo veer lang nao oetgekeken hauwe: oos resepsie. Veer höbbe van de ièsjste tot de lètste minuut genaote! Eine daag vol verrassjinge en väöl luuj die ós kaome fillesetere! Veer wille dan auch oet d’r grónd van òs hart jekereine bedanke dae langs is gekómme! Oetgetéld vele veer ’t ’s aoves op de bank, mit eine groate glimlach zunt v’r i sjlaop gevalle (nae, neet op de bank): ontzettend bedankt!!