Leef Waterratte en Waterratteleefhöbbersj

Dit zunt de ièsjte weurd die ich maog sjrieve es toekómstige hoagheid va Sjin.
Dao zoot ich dan…, april en mei waore um en juni waor al lang begonne. En nae, auch dit jaor neet gevraog um Prins te waere….Jaomer. 
Totdat ich eind juni gebeld woord mit de vraog of ich d’r veur veulde um in 2012 Prins te waere van de Waterratte en dao euver e gesjprek wool höbbe mit de Prinsekeuzecommissie.

Mie hart bonkde in mien kael en ich dach: ‘is dit ech waor wat mich noe euverkump’?
Allich bin ich metein op dit verzeuk ingegange. Laote v’r ins effe gans ièrlik zeen: zoaget lièste dich toch neet langs dien fièsnaas gaon?

Get later volgde dat gesjprek op eine veilige aafsjtand va Sjin.
’t Waor e hièl fijn en veur ós allemaol e vruchbaar gesjprek.
Mich woord haorfien oetgelag wat ’t inhilt um Prins te zeen en wat mich te wachte sjtóng es frisje Prins va Sjin.
Aan ’t ing van dae aovend höb ich de jónges laote weite dat ich hièl verièrd waor dat ich gevraog woord en höb auch metein de toezègging gedoan.

Ich kin uch zègke, ich gong dae aovend mit e geveul noa heim es of ich eine pries in de laoterie gewónne hauw. En dan höb ich ’t neet euver eine troeaspries.

Meh good, noe kump ’t, doe maogs nieks en geine get zègke.
’t Sjpikkelere van de luuj is al begós, vas en zeker.

Meh gelökkig kin ich zègke dat ich nog neet tössje de geneumde name sjtaon en ich bin auch nog neet aangesjpraoke es Prins van 2012 en dat geuf mich toch e sjtökske rös.

Ich bin d’r óngertössje jeker daag mit bezig en dink konsjtant draan, de sjpannig zal nog sjtiege, tot ’t hoagtepunt op d’r 7e jannewarie 2012.

In september bin ich same mit eine van de Prinsekeuzecommissie d’r sjteek gaon oetzeuke.
Ich kin uch zègke dat ’t dizze kièr get angesj gelaupe is dan anger jaore. Ich wól neet ièsj d’r sjteek oetzeuke en pas daonao e sjiek pak d’r bie pakke.
Nae, ich wól e geweldig pak oetzeuke en daonao eine biepassende sjteek aasjaffe.
Durch de vrieheid die de ganse Prinsekeuzecommissie mich dao in goof zunt veer dao in mien auge damen hièl good i gesjlaag.

Ich haup dat deer ’t op en nao 7 jannewarie dao euver mit mich eins zult zeen.

Noe res mich nog mer ei dink um te zègke es ‘Prins in wording’..:

Alaaaf aan jekerein!!