Huuj höbbe veer in de H. Mauritiuskirk aafsjied genómme va ós gewaardeerd Raod van Elf lid d’r Johan Wouters.

Vanaaf dees plaatsj, names carnavalsvereiniging de Waterratte, oos oprechte deilnumming aan ’t Lieske, femilie en vrung en alle luuj die kort bie d’r Johan sjtónge. Hièl väöl sjterkde bie ’t euverlieje van d’r Johan.

D’r Johan meldde zich in 1981, ei jaor nao de heroprichting van de Waterratte aa es lid bie d’r Raod van Elf. In al die jaore, en dat waore d’r väöl, va zie lidmaatsjap höbbe veer d’r Johan ervare es eine sjteunpilaer op väölderlei gebied. Eine man dae neet op d’r veurgrónd wól sjtao, meh dae ’t vazelfsjpraekend vóng binne de vereiniging te helpe wo dat nuèdig waor.

E trui lid mit dissiplien. Eine allemansvrund, ummer e vruntelik weurdje mit ein werm belangstèlling veur wie ’t mit ederein góng. Kort gezag: eine leve man dae dich ummer begroede mit de weurd “alles good?” “dát waor zoa kinmirken veur d’r Johan.

In 2012 woord d’r Johan keuninklik óngersjeie: lid in de Orde van Oranje Nassau veur zien izzat veur oos dörpsgemeinsjap veural op ’t gebied va verbinge va naobere, ’t vereinigingslaeve, de parochie, hoesbezeuk bie luuj die hulp zóchte en bie de kranke luuj.

Oos carnavalsvereiniging makde dankbaar gebroek van zien sosjaal betrokkeheid.

Jaorelank verzörgde en organizeerde d’r Johan ’t ziekebezeuk in de waek véúr de vastelaovend. Dat waor zie dink. Hae zörgde veur de vla’s es e bezeuk aan de bejaardesoos woord gebrach en hae trakteerde ós op vla bie opboew- of afbraakwerkzaamhede. Dat vóng hae vazelfsjpraekend. D’r Johan woord dan auch d’r “man van d’r vla” geneumd, eine troetelnaam dae eine griemel op zie gezich leet versjiene. Auch de donateursaksie waor e óngerdeil van zien werkzaamhede en dat daobie kaom ummer e vruntelik gesjprek aan de deur.

Veur ziene inzat veur CV de Waterratte woord d’r Johan in 1997 óngerwiel de jaorlikse biejeinkóms van alle carnavalsvereiniginge va Groat-Vallekeberg beneumd tot Lid va Verdeenste.

In ’t jaor 2000 woord hae óngersjeie mit de Ridderorde van de Lachende Waterrat, de hoagste Sjinse vastelaoves-óngersjeiing.

De lèste jaore góng de gezondheid van d’r Johan achteroet en kós hae op e gegaeve moment jaomer genog neet miè aktief deilnumme de versjillende carnavalsaktiviteite.

Jaomer genóg moos hae auch noadgedwónge zien vertroewde umgaeving achter zich laote. Dat doog pien en waor vraem veur häöm. Meh d’r Johan bleef dae vruntelikke, leeve man. Auch in de versjillende zörginsjtèllinge wo hae op ’t lètste woonde.

Johan, dank veur alles was doe gedaon höbs veur CV de Waterratte en oos dörpsgemeinsjap gedaon. Veer zulle dich mit väöl respek i gedachte haute. Doe waosj e veurbeeld veur ós allenej.

Johan, rös zach!