Prins Raymond II en prinses Aurelia regeren euver ’t Waterratteriek
Geplaatst op zaterdag 6 januari 2024.Op zaoterdig 6 jannewari 2024 zint Prins Raymond II en Prinses Aurelia oetgerope tot de nuuj heersjers van ‘t Waterratteriek.
Um hun baeter te lière kinne volgt hie de prinselaria:
Prins Raymond II (Bemelmanns, nae die dubbel ‘n’ is gein fout) is op 20 mièrt 1981 gebaore in Heële en daonao opgegreujd in ’t Kaatboereriek Kunder. Saer 2009 woont ‘r same mit zien prinses Aurelia in de Mauritiussingel in ‘de nuuj buurt’ va Sjin.
Raymond haet elektrotechniek gesjtudeerd in de plaatsj woo ‘r gebaore is. Gelökkig meh, want allewiel is ‘r servicemonteur bie Rite Hite Benelux in Twello (Gelderland). Mit zien bus beejt ‘r elektro-service veur klante in ’t ganse land. Es hobbies haet ’r voetballe bie de veteranen van SV Geuldal, hel loupe en zjwumme. Dat letste haet ‘r euvergehoute aan zien ièrstje baantje, badmeister zeen in Göllepe. Hae zal d‘r dit jaor dus good op litte dat ‘r gein Waterrat verzuup. Waterratte zint euverigens neet de einige deere die ‘r leuk vingk, Raymond geit namelijk hartstjikke gaer nao d’r deeretuin mit zien gezin.
Prinses Aurelia (Blom) is op 19 juni 1982 gebaore in de Hannewei in Sjin. Op ’n klein oetsjtepke nao, in 2008 haet ze effekes in Vallekeberg gewoont, woont zie al häör ganse leave in ’t dorp.
’t Horecablood sjtruimt volop durch Aurelia’s lief, sinds dat ze kint wirke deit ze dat dan ouch in de horeca. Dat ze de opleiding hotel- en eventmanagement haet gevolg is dan ouch gein verrassing. Huujsendaags wirk ze veur zichzelf es ‘hospitality consultant’. Es zelfsjtandige hulp ze ondernummersj um hun zaak zo soepel mogelik te laote loupe. Dat soepele kump ouch good van pas in häör hobby. Van kinds afaan is ze nammelik gek op danse. Zoa waor ze tot häör 18de solo-dansmarieke van de Waterretjes en geuf ze tegenwoordig les aan de dansgroepe van Club 77 en de dansmariekes in Vallekeberg.
Zoawie g’r aan de achtername kint zeen zunt Raymond en Aurelia (nog) neet getrouwd, mer waal al erg lang same. Saer 2 november 2008 zunt ze namelik e koppel. Ze höbbe zich in dat jaor liere kinne op ’t Oktoberfiès in Vallekeberg. Nog gein veer maond later kochte ze hunne prinsentempel in de Mauritiussingel. In dae prinsentempel zunt ouch hun twiè trotse waterretjes gebaore. D’r Kemen op 29 december 2012 um 15:11 oer en ’t Leire op 9 mei 2017 um 11:11* oer. (* De verloskundige hat weliswaar 11:12 oer opgesjreeve, mer häör horloge leep veur.)
Prins Raymond II en prinses Aurelia zulle dit jaor in d’r Sjinse vastelaovend veurop goon en dat is veur ze allebei ‘nne druim dae oetkump. Biegesjtange door hun twie waterretjes en d’r wieze road van elf gunt ze d’r same mit de luuj van Sjin e geweldig fiés van make!
Foto: Raoul Limpens
