Leef luuj van Sjin, Sjtröch en umsjtreke,

Afgelaope wiekend woar weer drök, meh wat wilste auch mit zoa langk seizoen. Op noa ’t Beumewaldersriek in Hölsberg met hunne prins Roger 3e & prinses Ilona, de Öss van Ees mit hunne prins Sander 2de en CV de Kaatboere oet Kunder mit hunne prins Rolf I, allemaol ‘nne dieke proficiat veur uch allemaol en bedankt veur ’t sjieke ontvangs op uch recepties.

En zoe biste weer een weak prins en nog altied midde in ’t vastelaovesgeveul, en dan geijste uns dinke euver wat dat vastelaovesgeveul eigenlijk waal is. Wat bringkt ’n ganse provincie 2 dieke maond in rep en roer. En veur väöl begint dat zelfs al rond d’r 11de van d’r 11de. En bie gèt rond vraoge merkste al gauw dat, dit veur ederein waal angersj is. Waal steijt vas dat ’t gèt is wat ste van kleins af aan van dien auwersj mos höbbe mit gekrege. En dan dinkste wat woar dat bie mich, natuurlik de auwersj mèr zeker auch d’r muziek.

Muziek waor en is nog altied ein van de belangriekste onderdeilen veur mich bie de vasteloavend, Toevallig kreeg ich van Lilian van Kempen, boave sjtoande foto. De Poetekapel waarsjienlik de jongste zaate hermenie van limburg. En es ich ’t good höb is dees foto oet 1998 en woar ich dao 14 jaor oud same mit mien vrung oet de fanfaar muziek make. Daonao bin ich nog bie de Geultröters, Puimetröters en natuurlik Akspetabel Gesjravel geweas.

Toch bin ich nog benuujd nao wat uch vastelaoves geveul is. Zuut d’r mich in d’r polonaise of geweun op de sjtroat vertil ’t mich dan. En misjien dat ich dan aan ’t eind van de vastelaovend ein complete verhaol höb.

“O ja” ich zauw ‘t nog bienao gans vergeate te zikke, Mèr kômmende zoaterdig sjtunt de OPA’s in de finale van ’t CMC Alaif. Wilt geer ze auch komme aanmoedige d’r zeen nog kaarte te kriege https://www.cmcalaif.nl/kaartverkoop!

Alaaf Prins Roel I