Leef luuj van Sjin, Sjtröch en umsjtreke,

Eindelik maog ich ’t dan zikke “ich bin d’r nuuje prins”. Wat kin zjwiege toch moeilik zeen. Zaoterdig 5 jannewari sjprong ich durch de deur nao ‘nne bom volle zaal in ’t Geboew. Miene druim is oetgekômme prins te zeen van de Waterratte van Sjin op Sjtröch. Dea aovend waor get wie unne film, wat un bombe sjtimmung, jonk en oud deeg mit. De ièrsjte kilometers polonaise zitte al in de bein en wat höbbe veer väöl gesjpronge. Ederein al hartsjtikke bedankt.

Toen woar ’t zondig 6 jannewari en sjting alles in ’t teike van de Jeug, wea weurd de nuuje opvolgers van Sanne en Fleur, zou ’t en prins en prinses, prins en minister of zoa es vurrig joar prinses en minister weure? Naodat oud prins Ralph en Oud Prinses Ivana in een tiedmasjien weg getouverd woare. Sjpronge Prinses Bente 1ste en Minister Kyra te veursjien. Wat sjiek wir meadsjes aan de macht bie de Waterretjes. Drek höb ich gekeke of dat polonaise laupe en sjpringe al bie dees geweldige meadjes in ’t blood zit. En leef luuj ich kin uch zikke dat dat gans good zit, lekker knoer hél sjnurre doar d’r zaal.

Afgeloape wiekend mog ich dan eg es prins mien ièrsjte taken goan doan, Op noa de reseptie van os jeug-prinses Bente en jeug-minister Kyra op vriedig. Wat ein sjoane resepsie woar dat, sjapoo vuur de Waterretjes. Daonao mien prinse-foto bie kaffee ’t Greafke bie Ans en Wim afgeave.

Zaoterdig op nao L1 um Andy & Roy aan te moedige in de hauf finale van ‘t LVK, mog ich mich toen zelfs mit de bühne op. Wat sjiek!!! Daonoa de foto afgeave bij Johnny en Sonja of te wel bie San Blas en vuur de luuj die dat nog neet kinne dat is woa kaffee Weerts en daonao In d’r Proemhook loog. Hiè nao op nao Valkeberg nao de reseptie van Prins Jef III en ziene minister Kevin. Altied biezonder um nao de Mirlitophile te gaon mit hun unieke lokatie onder d’r grond.

Zondag waor ‘t dan de beurt aan mich zelf, mien eige resepsie. Ièrsj intern wat waal hièl biezonder is, dea erme oud prins Ralph. Hea hilt absoluut neet van kiés mer um bie de OPA’s te komme moste toch ech dat Elske, boterham mit sjtinkkiés en dea hauve liter beer drinke. Alle respect vuur Ralph. Daonao de openbare recepsie wat woar ‘t drök. Ederein hartsjtikke bedankt vuur alle felicitatie, kaarte en kadoos.

't deit mich good al de rejakties die ich höb gekregen, ‘nne telefoon dea af en toe begos te sjwamme. Auch dat veer daag ’t Geboew sjtampe vol woar, sjapoo vuur al uch vasteloavesvierders en gekke.

Ich höb d’r hiel veul zin in, en es ’t afgeloape wiekende de norm is dan kump ’t gans good.

Prins Roel I