Zef Swillens beneumd tot ièrelid va CV de Waterratte
Geplaatst op maandag 19 februari 2024.Carnavalszóndig is, veuraafgaond aan de priesoetreiking van d’r optoch, d’r Zef Swillens beneumd tot ièrelid van oos vereiniging. D’r Zef kreeg oet heng van Prins Raymond II en Prinses Aurelia de biebehuèrende ièremedalje.
D’r Zef is al saer de heroprichting mit de Waterratte verbónge. Hae waor d’r ontwerper van d’r 1e prinsewage in 1981 en vaaaf dat jaor ontwórp en sjilderde hae alle volgende prinsewages.
Wie hae in 1983 zelf woord oetgerope es Prins Zef I hauw hae vanteveure ziene eige prinsewage ontwórpe en boewde hae volle petaj mit aan ziene eige wage, want geine moch in de gate kriege dat hae dao op e gegaeve moment es nuuje prins op zou sjtaon. D’r ploog wageboewersj begós imn dae tied al direk nao de kaesjmis mit d’r boew.
D’r Zef woord durch zie prinssjap van 1983 offisjeel lid van CV de Waterratte. En wát veur e lid: ummer bezig mit semmelig get dinger, nieks waor häöm teväöl. Eigelik teväöl um op te neume. D’r Zef sjtóng in ós dörp, behalve es hoessjilder, auch bekind es dekorasie- en kunssjilder en ’t sjprik veur zich dat grellig gebroek gemak woord van zien kreativiteit. Hae ontwórp de borsjplate van d’r Raod van Elf en bauw alle prinsemedaljes. Hae waor veur CV de Waterratte auch d’r man van de dekórs, verseringe en teksborde.
Auch veur de OPA’s waer hae aktief. Zoa sjtarde de Oud Prinse hun optraes es Star Sisters ónger ein galazitting in 1984. E optrae dat insjloog es ein bóm. Dit artiestetrio besjtóng wiejer oet d’r Piet Vleeg en d’r Jo Dirks. De ièstje drie Oud Prinse dus, en ein tradisie waor gebaore. E groat aantal jaore waor ’t optrae van de OPA’s e haogtepunt bie de jaorlikse galazittinge, optraes die d’r zaal in dae tied op d’r kop zatte..
Al sjnel woord d’r Zef gesjtrik es zjurielid van d’r Sjinse carnavalsoptoch en woord hae auch oetgeliènd um d’r Vallekebergse optoch te zjurere. Väöl wageboewers en groepe lete hun teksborde durch d’r Zef make en in richtig Sjins plat gesjreve.
D’r Zef is auch d’r initsjatiefnummer van de prinseresepsie. Hae sjtèlde nao zie aaftraeje veur um ein resepsie te houte veur d’r nuuje prins en waal op d’r daag nao zien proklamasie… en zoa gebeurde dat auch. In 1984 woord de ièsjte prinseresepsie gehoute in hoeve Maessen (bie d’r Ser) in Sjtröch. Naodat d’r Frans Stassen in dat jaor woord oetgerope es prins waor d’r daag derop um 11.11 oer de ièsjte prinseresepsie en dao zunt nog väöl resepsies gevolg. Op d’r daag nao de proklamasie.
D’r Zef hauw mit dit inisjatief veur ouge um- naeve de ièsjte kinnismaking mit d’r nuuje prins en prinse- veural e carnavalswiekend te organizere dat ouch nog ins flink get duite opbrach veur de vereiniging. Veur zien väöle verdeenste veur CV de Waterratte en de veur de Sjinse Vastelaovend woord hae in 1989 terech óngersjeie mit de Ridderorde van de Lachende Waterrat.
Van harte proficiat Zef!
Foto's: Roel van Weersch



