Prins Ralph I en Prinses Ivana

Proclamatie

Veer, prins Ralph d'r ièrsjste,

Sjpin in ‘t web van Sjinse ongernummers en vereiniginge, online Prins van de Waterratte, nuuje burgemeister van Sjin Centrum en d’r Kirkplei, ièsjte groate prins van d’r Baanberg, voetbalprins van SV Geuldal,

prinselikke hoffotograaf van de CV, bedinker en regisseur van filmkes, skétsjes en angere kwatsj, opperwaterrat van Walem tot d’r Keuteberg en van d’r Krekelbusj tot Oud Valllekeberg

Make biegesjtange door d'r President en d'r Wieze Raod, de noe kommende elf reigele bekint:

Ten 11e
Dat ich dit jaor same mit ’t Ivana euver Sjin zal règére onger ’t motto:

In Sjin is alles top en daorum zette veer mit de karnaval alles op d'r kop!

Ten 10e

Dat ich dit jaor eindelik ins mien eige prinsenfoto op Facebook kin goesje en dat geer dem allemaol maog liken

Ten 9e

Dat Appie Hein vanaaf noe mèr zelf op de kleintjes mòt lette want 't Ivana en ich höbbe dao gaar geine tied miè veur

Ten 8e

Dat veer koste noch meujte gespaard höbbe veur prins en prinses van Sjin te waere. Ich bin oet ge Pannes vertrokke, ‘t Ivana is van Wielder nao Sjin verhoest en same zint veer in ‘t centrum van ‘t dörp gaon wone. Veer zulle d’r Erik Engele vraoge um de res van het hoes gewoon tot prinsetempel te verboewe, dan kint de CV dao de kommende jaore d’r nuuje prins oetrope.

Ten 7e

Dat de Lente mien favoriete joargetièje is. Dat is auch waal logies want ich maog d'r ganse daag in de knappe auge van mien eige tandarts-assistente kieke

Ten 6e

Dat Sjin ‘n echte top-heerlijkheid is, want:

Bie os kin-ste op vakantie in topparken en tophotels;

Bie os kins-ste bienoa nao ’n top-vrieje-sjoal, want missjien kump die d'r toch nog;

En bie os kin-ste lid weare van top-vereniginge; de mòs dich allein noch effe lid make

Ten 5e

Dat voetballe bie ós in familie hoag in de vaan sjteit. Jaomer genog höb ich es voetballer neet 't hoagste bie SV Geuldal gehaold. Mer anger familieleden is t waal geluk um dae top binne de voetbalklup te haole. Miene pap Frans waor veurzitter en miene broer Luuk is kieper van ‘t ièrsjste. Mer es Prins van de Waterratte höb ich dit jaar d'r allerhoagste top van Sjin bereik. Unne druim dae noe eindellik oetkump

Ten 4e

Dat door de nuuj brök euver de Geul d’r Sjinse Optoch noe ’n graot rundje um Sjin kint make.  Opsjtelle bie ’t Graefke en dan euver de brök nao Oud Vallekeberg, Struch en Sjin.

De wageboewers motte dan waal rekening haute mit de breite van de nuuj brök. Ze motte de carnavalswagens dan op zien “Mesjtreechs” geboewe: neet breid mer laank

Ten 3e

Dat SV Geuldal, alias Sjtröchter Boys, d'r titel van prinsellik hofleverancier kriet, want nao prins Bart bin ich alwir d'r zoavöälste prins van d’r voetbalklup en mit zoavöäl jeug zulle d'r zeker noch waal ‘n aantal volge.

Ten 2e

Dat d'r nog vöäl Bed and Breakfast zaken in Sjin moge kòmme. Dat is namelijk good veur het ledenaantal van de CV, want de eigenaere van de B&B's the SJinn en Panorama Sousberg zint allemaol lid van d'r Raod van 11 gewaore. Van plat tot valsj plat en van lièg tot hoog Huilands, auch binne osse wieze raod is ’t op taalgebied noe multiculti

Ten 1e

Dat veer al 2 jaor ‘n polonaise-stage höbbe gevolg. Iersj bie prins Niels en prinses Femke en ‘t aafgelaupe jaar bie prins Bart en prinses Anne. Veer höbbe os zelfs al aangemeld bie ‘t Guinness Book of Records, want zou ‘t os lukke um alle luuj van Sjin in ein graote polonaise door ‘t dörp te laote trekke? Dat zouwe veer noe ins ech sjiek en top vinge. Veer zint d'r klaor veur. Doot geer mit?

Ten Letste

Dat mit de sjoan dinger van vreuger en de multiculti-media-waereld van huuj, d'r Sjinse vastelaovend zal blieve veur al oos luuj.

Blief allemaol de Sjinse vastelaovend viere vanoet eur hart, dan blief de Sjinse karnaval ummer apart.

 

Gegaeve i Sjin op 6 jannewari 2018

Prins Ralph der 1e van de Waterratte, biegesjtange door d'r President en d'r Wieze Raod

Prinselaria

Bétste luuj van Sjin,

Veer, ’t nuuj prinsepaar, Prins Ralph d’r ièrsjte en Prinses Ivana en sjtèlle ós gaer aan uch veur.
Ich, Ralph Souren, bin gebaore op moondig 18 oktober 1993 rond de klok van 11 minute op hauf 2 in de nach. Mien gebaorteplaatsj waor Kirkrao, mèr nog veurdat de zon opkaom loog ich alwèr in mie bidje i Sjin. Ich bin d’r middelste zoon van d’r Frans en ‘t Anja. Mien breurs zint d’r Erik en d’r Luuk.

Ich begós mie sjtudentelaeve bie ’t Paddesjteulke i Sjin um vervolges door te sjtruime nao de basissjoal Sint Antonius. Toen mien basiopleiding nao 8 jaor waor voltoajd, sjtapte ich op d’r fiets richting ’t Sophianum i Gullepe. Dao höb ich in 5 jaor tied de HAVO aafgerond. Oeteindelik eindigde mie sjtudentelaeve i Mesjtreech wo ich in 2015 mie HBO-diploma Communication & Multimedia Design haolde.

Jaorelank höb ich bie de Sjtröchter Boys gevoetbald dat later SV Geuldal woort. Door d’r voetbalklup bin ich in de waereld van de multimedia-design gerold. Toen ich de website van de Sjtröchter Boys euvernoom is ’t media-belke ech beginne te rolle, mit es resultaat dat ich noe mie broad verdeen es zelfsjtandig multimedia-óngernummer. Es ZZP-er maak ich noe veur vöäl klante binne en boete Sjin website’s, logo’s, posters, flyers, filmkes, foto’s en noch vöäl miè.

Daonaeve wirk ich auch noch bie d’r umroop L1, wo ich es online producer de website en social media beheer. Dat doon ich auch reigelmaotig op de groate Limburgse vastelaovends-podia, zoa-es bie ’t LVK, wo ich dan auch noch aktief bin es fotograaf.
Aanpakke is mich en mien prinses Ivana neet vraem. Same mit ’t Ivana höb ich jaorelank mit vöäl plezeer bie Albert Heijn i Vallekeberg gewirk. Binne ’t team waor eine hechte vrundsjapsband en same höbbe veer dao dan auch eine super leuke tied gehad. Bie Appie Hein lièrde ich dus ’t Ivana kinne en in 2015 sjloog de vonk ech euver en sins dae tied sind veer biè-ein.

Ivana is gebaore op zaoterdig 9 juli 1994 es dochter van d’r Rob Franssen en ’t Truussien Pieters. Same mit huère jongere broor, d’r Diego, haet ’t Ivana bienao huèr ganse laeve in ’t Puimeriek i Wielder gewoond. Sinds november van vurig jaor wone veer same in ’t hart va Sjin. Het auwt hoes van ’t Jeanneke Bosch aan d’r Baanberg zal dan auch dit jaor ózze prinsetempel waere. D’r pap van ’t Ivana is eigelik ein hauf Waterrat want hae haet zien jeug in Sjin doorgebrach. Dat ’t Ivana i Sjin is komme wone is dus gaar neet zoa vraem.

De kari-jaere van ’t Ivana begós op de basissjoal Op de Tièn Bunder in Wielder. Daonao sjtruimde ‘t door nao ‘t Sophianum i Gullepe. Naodat ’t Ivana gesjlaag waor veur de Havo ging ’t wièr sjtudére. Ièrsj sjlaagde ’t veur de opleiding es pedagogisch mitwirker en of dat neet genoeg waor volgde ’t auch noch ein opleiding es tandarts-assistente. Van de létste opleiding haet ’t auch huèr beroep gemaak want ‘t wirk es tandarts-assistente bie tandartsepraktijk Kusen & Van Strien i Gullepe.

Es echte waterrat weit ich wat d’r de kommende waeke op ós aaf kump. Veer höbbe de aafgelaupe jaore al good gekéke nao ós veurgengers en same zulle veer d’r veur zörge dat Sjin mit de vastelaovend wir ins behuèrlik op zien fundamente geit sjödelle. Veer haupe dat veer d’r same ei super sjoan fiès van kinne make en wunsje uch allemaol eine geweldige vastelaovend!

Vastelaovend same!

Prins Ralph l en Prinses Ivana