Prinsenpagina

 width=

Prinselaria 2017

Aangenaam, Prins Bart I, in ’t dageliks laeve Bart Stevens, 23 jaor. Zoon van Chris en Netty en broor van Koen en Rik.

Gebaore op 24-11-1993 es Brikkebekker i Brunssum. Naodat ich aafsjtudeerde aan de creche in Brunssum, waor mien mam bekómme van de bevalling en zunt veer nao Sjin verhoest. Dao hub ich mien sjtudie vervolgd op de basissjoal va Sjin.

Toen ich 6 jaor oud waor woort ich gescout door de Sjtröchter Boys. Nao e paar jaor in Sjtröch gevoetbald te hubbe, woort ich door miene zaakwaornummer verkoch a Haelder en vervolgens a Houthem. Toch waor ‘t Sjin wat mich ’t meiste waert waor. Nog ummer wirk ich aan ’n suksesvolle voetbalkari-jaere en hub ‘t inmiddels gebrach tot SV Geuldal 2. Waarsjienlik dat ich nao dit prinsesjap en tig kilomaeters polonaise ein basisplaatsj op ‘t ièrsjte kin bereike.

Umdat ich nogal van remmiedemmie houwt, hauw ich al jaore op ’n tróm bie de sjötterie. Van mien 12e tot mien 16e hub ich ein klein pauze ingelasj en hub ich anger dinger gedaon. Mèr d’r drang nao “hauwe op die kis” waor toch te groat en bin ich weer truukgegange nao de sjötterie. Auch bie de sjötterie hub ich noch ambities. Nao de tróm wil ich gaer in de vootsjtep van miene pap traeje en “hoag van d’r taore blose” mit eine sousafoon. Of dat geit lukke mótte veer nog mèr effe aafwachte. Ich bin al flink aan ’t oefene.

Nao de basissjoal hub ich 2 jaor HAVO, 2 jaor VMBO, 2 jaor MBO tummerman en 2×2 jaor MBO bouwkunde gesjtudeerd. Noe doon ich al bienao 2 jaor HBO bouwkunde. Zou ’t mich auch lukke um 2 jaor Prins van de Waterratte te zeen?

Natuurlik mót ich auch nog get geld verdeene veur oetgaon en anger leuke dinger. Daoveur wirk ich bie de Hanos in Vallekeberg en zoa wie ’t veur ein goei waterrat huèrt natuurlik op de vusj-aafdeiling.

Naeve ‘t voetballe en de sjötterie is muziek auch eine groate hobby van mich. Same mit Roy Geelen hub ich ein eige DJ-installatie. Nao de karnaval kint d’r ós inhuure veur fièskes en parties. Veur alle soorte muziek kint d’r bie ós terech; van karnevalsmuziek tot house. Op dit moment is vinyl, of te waal plestiek plaetjes, oos handelsmerk.

Natuurlik wil ich auch mien Prinses Anne aan uch veursjtèlle. Ich hub Anne bie de sjötterie lière kinne. Zie waor de keuningin van heure naef Tim, dae in 2013 en 2014 keuning van de sjötterie waor. Dus mit adelikheid hubbe veer al genóg ervaring.

Anne is op 28 april 1983 in Haelder gebaore. Daonao haet pap en mam, d’r Zef (Schlenter) en ’t Mieke (van Weersch), ze wir hièl sjnel mit nao Sjin genómme. Same mit heur zusterke ’t Elle is Anne opgegrujd baove d’r kaffee aan d’r Kirkplei.

Basissjoal in Sjin, Mavo in Vallekeberg en daonao de verpleegkundige opleiding in Mesjtreech. Op dit moment wirkt ze es verpleekundige bie ’t vreugere Vijverdal, auch in Mesjtreech.

Anne is vreuger lid gewaes van Club 77. Nao eine gezellige aovend mit de vrundinne en ‘t drenksjke ”Troyka pink” waore “De Pinkladies” gebaore. Mit dees “ladies” haet ’t Anne noe noch ummer eine hechte vrundsjapsband en weurt zich nog ins gaer eine op de lamp gesjöt.

’t Naefke Garcia kump gereigeld vanoet ’t Belsj bie os logére. Dao geneete veer geweldig van. Ich bin benuujd of veer bie heum auch ‘t karnavalsblood aan ’t sjtruime kriege.

’t Anne hilt van gezellige aovende mit vrung en van oetgaon. Ze is dan auch euveral veur te vinge. Dus Waterratte houwt uch mèr vas. Veer kómme d’r aan en zulle dit karnavalsseizoen duchtig op de tróm hauwe en volle gaas gaeve!!

Hoagachtend Prins Bart I en Prinses Anne

Proklamasie 2017

Veer, prins Bart d’r ièrjste, plestiek plaetjes drièjer van de Sjinse kaffees, 2e nach-burgemeister van Ingwaege, bewaker van d’r Keuteberg en d’r Kirkplei, voetbalprins van ’t 2e elftal van Sjtröch, vusjkeuning van de Hanos, toekomstig boewkundige van sjeif hoezer en andere boewvallige projecte, veurop sjöt aan ’t buffet en prinselijk trómslaeger van de Sjtröchse sjötterie

make biegesjtange door d’r President en d’r Wieze Raod, de noe kómmende elf reigele bekint:

Ten 11e
Dat ich dit jaor same mit ’t Anne euver Sjin zal regere ónger ’t motto: veer hauwe duchtig op de tróm en gaeve gaas, want mit de vastelaovend zint veer allemaol d’r baas.

Ten 10de
Dat ‘t 2e van SV Geuldal, alias Sjtröch, ‘t dit jaor zónger hunne topsjpeler mót doon, zoewaal op ’t veld es aan ’t buffet. Kriege de reservesjpelers auch ins de kans um zich van hunne bètste kant te laote zeen.

Ten 9de
Dat de Hanos dit jaor kint advertere mit de leus: ózze vusj is nog lekkerder en apart es deer waert geholpe door oos Hoogheid Prins Bart.

Ten 8de
Dat al dat sjporte, traine en danse noe good van pas kómme, want de kómmende waeke zulle veer zeker gein polenaise euver sjlaon.

Ten 7de
Auch al bin ich es Brikkebekker in Brunssum gebaore en groat gebrach door ’t Netty en d’r Chris, 2 echte Bök, veul ich mich ein rasechte Waterrat.

Ten 6de
Dat ’t prinselik blood binne oos familie al ièder door de adere sjtruimde, want miene broor Koen waor al jeugprins van de Waterretjes. Mèr veur jeugprins bin ich get te oud en daorum maog ich noe Prins waere van de groate Waterratte.

Ten 5de
Dat ich dit jaor d’r vogel van de sjötterie neet hub aafgesjaote is logisch, want me mót ièrsj prins zeen gewaes veurdat me keuning kint waere. Dus mien sjöttersvrung zint veur ’t volgend keuningsvogelsjete gewaarsjuwd.

Ten 4de
Dat ich gaer nach-burgemeister van Ingweage wól waere. Mèr helaas is die functie al vergaeve aan d’r Jos. Ein hiél sjwoar en verantwoordelikke baan. Dat kinste hiél good zeen es hae prinsewach haet gehad, want zelfs sjnachs controleert hae d’r waeg van links nao rechs um te kieke of d’r gein löker in zitte.

Ten 3de
Dat ’t Anne, veur dit prinsesjap, al 2 jaor stage haet gelaupe bie de sjötterie. Dus ich hoof mich gein zörrig te make dat veer d’r es prinsepaar neet good bie laupe.

Ten 2de
Dat ich mit d’r Sjinse optoch gaer ei plaetje op d’r prinsewage wil drièje. Mót de carnavalsvereiniging waal ièrsj ins flink in d’r geldbuul graaie veur ein duchtige geluidsinstallatie want ich mót natuurlik waal volle gaas kinne gaeve.

Ten 1ste
Dat ich mit mien boewkundig inzich en talente ein goei biedrage kan levere aan de veiligheid van de waeg in Sjin. Dan kómme de presidente en de res van d’r raod van 11 tenminste zónger de kneuk en rubbe te braeke ’t sjnachs good heim en kinne veer d’r tot esjelle goonsdig same eine ónvergaetelikke vastelaovend van make.

Ten lètste
Dat mit de sjoan dinger van vreuger en de sjötters en voetbalgekke va huuj, d’r Sjinse vastelaovend zal blieve veur al oos luuj. Blief allemaol de Sjinse vastelaovend viere vanoet eur hart,
dan blief de Sjinse karnaval ummer apart.

Gegaeve i Sjin op 7 jannewari 2017

Prins Bart d’r ièrsjte van de Waterratte

Biegesjtange door d’r President en d’r Wieze Raod