Prinsenpagina

Op 4 jannewari zint Prins Martijn d’r twiède en Prinses Milenka oetgerope tot de nuuj heersjers euver ‘t Waterratteriek.

Um hun baeter te lière kinne volgt hiè de prinselaria:

Prins Martijn II (van Kempen) is op 12 mièrt 1980 gebaore in ’t hollendsje Vlaardinge (in de buurt va Rotterdam). Tot zien elfde woonde hae same mit ziene pap Martin (ex-penningmeister van ós CV), zien mam Wil, zien breurs Edward en Erik en zien zösterke Lillian in Maassluis (auch bie Rotterdam in de buurt). Umdat d’r Martin werk kos kriege in Zuud Limburg en d’r Martijn doa-bie auch noch ins furore kos gaon make bie de Sjtröchter Boys, zint ze toen in Sjin (absoluut neet in de buurt va Rotterdam) komme wone.

‘t Letste jaor van ziene liègere-sjoal-tied heat Prins Martijn dan auch nog op basissjoal Sint Antonius mét gemak. Vervolges ging hae via ‘t Sophianum in Göllepe aan de sjtart mit de opleiding tot radiodiagnostisch laborant (hiè motte veer nog e Sjins woord veur verzinne?). Vanaaf toen kaom prinses Milenka al in beeld. In zien lètste jaor kreeg hae namelik d’r opdrach um ‘nne ièrsjte- jaors-sjtudent te begeleide...  en dat waor inderdaad ‘t Milenka! Op dit moment wil se leever neet dat d’r Martijn dich kump ophaole in ziene bedriefsauto, hea riejt namelik op de ambulance.

Martijn en Milenka woorte metein de beste vrung, ginge same op sjtap tot de late uurkes (woo-bie ‘t Milenka gereigeld d’r BOB waor) en sjtinge auch gereigeld in de keuken same te kokkerelle. De liefdesvlam in de pan sjloog pas ech euver op Keuniginnedaag in 2002. Daonao ginge ze samewone baove ’t tenkstastion in Sjuémer en trouwde ze op 31 oktober 2003. Ze viere in 2025 dus hun eige jubileum want ze zint dit jaor 2x11 jaor getrouwd.

Nog veurdat in jannewari 2004 dochter Nadja woort gebaore verhuusde Martijn en Milenka, mer bleeve ze in Sjin. Ze ginge in de Warande wone, wo in mièrt 2006 hunne zoon Raiko gebaore woort. Oeteindelijk verhoesde ze nao hun prinselijke woning in d’r Breiwaeg.

Prinses Milenka is op 28 augustus 1980 gebaore in Waubach. Tot heur 19 woonde ze dao mit heur auwersj enn zuske Romana. Milenka hat ummer väöl gedans. Vreuger in de Grunstraot en later sjtijldanse. Nao un paar jaor woort Milenka danslierares bie de Waterretjes. Op dit moment danst ze bie Slovenska Folklorna Skupina, eine Sloveense volksdansgroep, want in Slovenië lieke de roots van ‘t Milenka. Neave ‘t danse wirk ze ouch nog in ‘t ziekehoes in Mestreech, es bedriefskundig direkteur van ‘t Comprehensive Cancer Center (hièveur höbbe veer auch gein Sjins woord kinne verzinne?).

Oos prinsepaar is väöl boete te vinge: langzaam laupend met hond Frenkie en hél laupend zonder hond Frenkie. Fietse door ós Heuvelland dunt ze auch hièl gaer. Wat waal gezag mot waere is dat ze bie dees activiteite de pauzes op terrasjes erg belangrijk vinge. Sjus zo belangriek es vakantie viere, woo-bie ze euver de ganse waereld reise en kinnes make mit biezondere luuj, culture en  natuur.

Martijn en Milenka zunt gruetsj op hun kinger en höbbe ze ‘t vastelaovesblood dan ouch vanaaf de ierste seconde mit gegaeve. Zo is Raiko in 2017 jeugprins gewaes en danste Nadja jaorelangk bie Club 77. Same kump hunne prinsedruim noe in vervulling en make ze d’r dit seizoen ei sjprookje van, ei sprookje dat geer wellicht auch truuk zult zeen in hun schitterende prinsekleijer.

Sjin Alaaf!

Foto: Raoul Limpens

Ich, prins Martijn d’r twiède,

Adelike bewoner van d’r Breiwaeg, opperbroeder van alle ambulancepersoneel, keuning van alle boeteluuj, sjtamgast van mennig terras en opperwaterrat van de Sjinse carnaval van Walem tot d’r Keuteberg en van Oud-Valkeberg tot d’r Krekelsbösj.

Maak, biegesjtange door mien Prinses Milenka, d’r President en d’r Wieze Raod de noe kommende elf reigele bekint:

Ten 11e
Dat ich mich, es nuuje prins, in ’t carnavalsgeweul zal sjtorte onger ’t motto: Met sirene en sjweileech veurop, laupe veer de polonaise non-sjtop.

Ten 10e
Dat ich vanaaf noe, es gebaore Hollender, waal plat kin kalle.

Ten 9e
Dat veer dit joar, neave sjoekele en polonaise laupe, auch af en toe ein Sloveens denske make. De prinses zal os hiebie veurgaon. Nae-zegke is neet toegesjtange en onbeholpe danspeskes zint oeteraard toegesjtange.

Ten 8e
Dat ich blie bin dat veer dit jaor éch In gen Dörp kinne blieve um d’r Sjinse vastelaovend te viere. Laot v’r dat dan auch mit z’n alle doon!

Ten 7e
Dat miene pap, d’r Martin, de kommende waeke ozze perseunlike penningmeister is en zörgt dat veer altied genog bonne bie de hand höbbe.

Ten 6e
Dat de luuj, die op carnavalsvriedig klage euver helle muziek in d’r lèmpkesoptoch, op zondig gratis entree kriege in ’t Geboew, zoadat ze heim gein las höbbe van d’r muziek.

Ten 5e
Dat de 5x11 jaorig jubilerende jeugcarnaval dit jaor éxtra in d’r sjpotlight maog sjtaon, want zónger jeug haet d’r Sjinse Vastelaovend gein toekoms!

Ten 4e
Dat d’r raod van 11 auch veur oos mascotte Frenkie mot zörge, al höb v’r leever dat eemes angersj ‘m oetlaot. Geer kint uch vanaaf noe aanmelde!

Ten 3e
Dat de wirkzaamhede aan de sjtraote en de leidinge veur de carnaval klaor zint, zoadat d’r optocht zonger umleidinge en probleme door os dörp kint trekke.

Ten 2e
Dat ich ièrder opa waer, dan dat ich bie de OPA’s maog.

Ten 1e
Dat veer same mit ós kinger Nadja en Raiko zoaväöl polonaises zulle laupe, dat veer nao die doldaag allemaol nuuj sjeun motte gelle.

en Ten lètste
Dat mit de sjoan dinger van vreuger en huuj, d’r Sjinse vastelaovend zal blieve veur al oos luuj.
Blief allemaol de Sjinse vastelaovend viere vanoet eur hart, dan blief de Sjinse carnaval ummer apart.

Gegaeve i Sjin op 4 jannewari 2025

Prins Martijn d’r twiède van de Waterratte,

biegesjtange door Prinses Milenka, d’r President en d’r Wieze Raod.