Prins Phil I en Prinses Mariël

Proklamasie

Veer, prins Phil d'r ièrsjste,

Groatvorsj van Sjin tot Walem en van d’r Keuteberg tot Klumme, voetbal hoaglustigheid van ‘t 3e van SV Geuldal, bestjuursprins van CV de Waterrate, vastelaovesgek in hart en nére, hoag van der taore-blaozer van de Sjinse sjötterie, opperwaterrat van alle Sjinse heerlikheden en buurtsjappe

Make biegesjtange door d'r Presidènt en d'r Wieze Raod, de noe kommende elf reigele bekint:

Ten 11e
Dat ich euver Sjin zal regére onger ’t motto: Get sjaele zeiver en get kwatsj, ze pas os allemaol, die vastelaovendspatsj!

Ten 10e
Es verzamelaer en verkuiper van voetbalplaetjes gaon ich noe ein eige serie oetgaeve…. en waal carnavalsplaetjes van d’r Sjinse Vastelaovend. Mit al hun Sjinse Oud Prinse en anger karnavalsgekke. Volgens mich weurt dat ei groat succes. D’r kint  ze vanaaf noe via mien website besjtelle: www.sjaelezeivervasteloavendpleatjessjin.nl

Ten 9e
Dat ich dit jaor duchtig väöl polonaises mot gaon laupe is gaar gein probleem, want ich höb al hièl get kilomaeters in de bein zitte es oud jeugprins, raod van 11 lid van de Waterretjes en lid van d’r groate elver-road van de Waterratte. Ins kieke wae mich allenei bie kint houte.

Ten 8e
Dit jaor is alles ei bietje angers. Prins va Sjin, auch al woon ich in Klumme, en ein prinses van Walem höbbe veer auch nog neet deks gehad. Zal ich miene prinsetempel dan auch meh op ‘n ongewoon plek make. Mesjiens in de kloes op der sjaesberg. Höbbe veer met d’r Sjaesbergergank auch nog ei bietje ’t vastelaovendsgeveul…

Ten 7e
Miene prinsetempel in ’n Wigwam, dat liek mich auch waal get. Uns effe aan mien vastelaovendsvrung vroage of ich de Wigwam veur dit joar kan liène. Kin ich die in Sjin bie mien auwers in d’r veurtuin zette…

Ten 6e
Mit zoaväöl “sjötters” bie de CV, es oud-prins of lid van d’r raod van 11, kinne veer gemekkelik ‘n twiède sjötterie in Sjin oprichte. Unne naam höb ich mich al bedach: Sjötterie Voorwaarts. ’t Beukske van dees nuuj vereiniging höb d’r al in de brevebus kinne vinge. En este bie dees sjötterie d’r vogel aafsjuuts weursjte geine keuning meh d’r nuuje prins van Sjin.

Ten 5e
Noe ’t Graefke auch eine aetkaffee is gewaore höbbe veer in Sjin eigelik geine echte kaffee miè. Meh gelökkig hove veer in Sjin geine dorsj te lièje, want bie al die aetkaffees kint d’r uch noch ummer ein pilske gaon drinke. En ze höbbe mich belaofd dat ze mit de karnavalsdaag allemaol aope zint. Dus drink uch gerös meh eine op mich en mien prinses en d’r Sjinse vasteloavend. Meh neet vergaete, d’r mot waal nog effe zelf betale.

Ten 4e
Gelökkig is ‘t Mariël, mien prinses, appetièkersassistente. Dus eine kater of ein verkoudheid is gein probleem.Met ei pilke, ei drènkske en de leefdevolle verzörging van mien prinses bin ich zoa waer genaeze en laup ich veurop in de polonaise.

Ten 3e
Bie de Sjötterie blaos ich noe jachhoorn. In ’t begin waor ‘t effe wenne en klonk ‘t wie ein zaate hermenie. Meh nao väöl oefene en get repetisies klinkt ’t al ‘n sjtök baeter en kan de carnavalsjach beginne.

Ten 2e
Noe de OPA’s veur d’r veerde kièr de Vallekebergse Sjlagerverkeezing höbbe gewonne mot ich toch mèr zangles gaon numme. Auch al blaos ich bie de sjötterie hoag van d’r taore, bie de oud Prinse mot ich sjtraks de sjterre van d’r hemel zinge. Want ich höb gehuèrd dat die OPA’s zelfs mit 2 man 4-sjtummig kinne zinge.

Ten 1e
Dat mien vrung van CV “dien ganse familie daug neet” ’t dit jaor zonger mich motte doon. Ich mot mich jaomergenog aafmelde umdat d’r graote druim van mich eindelik oetkump. Ich waer Prins van De Waterratte van Sjin. Es dat gein good ekskuus is dan weit ich ’t neet miè. Dat is toch super sjiek.

Ten lètste
Dat mit de sjoan dinger van vreuger en de karnavalsgekke van huuj, d'r Sjinse vastelaovend zal blieve veur al oos luuj. Blief allemaol de Sjinse vastelaovend viere vanoet eur hart, dan blief de Sjinse karnaval ummer apart.

Gegaeve i Sjin op 4 jannewari 2020

Prins Phil d’r ièrsjste van de Waterratte, biegesjtange door d'r President en d'r Wieze Raod

Prinselaria

Prins Phil I

Phil van Oers, 33 jaor, opgegreujd in Sjin en óngeluifelik verleefd op ‘t Mariël.

Pap en mam, d’r Paul en ‘t Miranda van Oers, hauwe al vreug in de gate dat d’r Phil eine rasechte  carnavalist waor. Prins waere bie de Waterretjes waor dan auch onvermeidelijk. Phil is daonao noch lang lid gewaes van d’r Raod van Elf van de Waterretjes... mèr veur d’r Phil is d’r mèr ein dink wat sjpeelt! Groate prins waere is ummer ziene druim gewaes.

Broor Neal is inmiddels getrouwd mit ’t Inge en höbbe kortgeleje ei zoontje gekrege. Mèr d’r Neal wèt es geine andere... veur d’r Phil is d’r mèr ein dink wat sjpeelt! Groate prins waere is ummer ziene druim gewaes.

Opa en oma Pasmans wone in de Grach. Van de familie Pasmans zint d’r Dave en d’r Joris lid van de CV. D’r Dave is inmiddels veurzitter en president van die vereiniging. Toch weite opa en oma Pasmans es geine angere... veur d’r Phil is d’r mer ein dink wat sjpeelt! Groate prins waere is ummer ziene druim gewaes.

Euverdaag vult d’r Phil zien daag mèt wirke es HR Professional bie TAPFIN-Manpowergroup Solutions (noe bie DSM). Un drökke baan mer tussjedoor toch nog effe tied... want veur d’r Phil is d’r mer ein dink wat sjpeelt! Groate prins waere is ummer ziene druim gewaes.

In d’r sjpaarzame vrieje tied is d’r Phil lid van... hauwt uch vas luuj:

  • besjtuurs- en raod van elf lid bie ós CV;
  • voetballer bie ’t drieëde van SV Geuldal;
  • klaroenblaozer bie de sjötterie;
  • penningmeister bie de R.K. Sociëteit Gordon Ramsey;
  • lid van d’r groep “CV dien familie daug neet”;
  • supporter van MVV;
  • leefhöbber van sporten, zoa es mountainbike en renne;
  • beheerder en eigenaer van webwinkel Voetbalstickersworld;
  • vaste deilnummer es d’r örges get te sjtappe is mit vrung;

mer toch... veur d’r Phil is d’r mer ein dink wat sjpeelt! Groate prins waere is ummer ziene druim gewaes.

Veurig jaor verhoesde Phil nao ‘t molmoezeriek in Klumme um same te gaon wone mit ‘t Mariël. Unne sjwaore sjtap want d’r wèt ’t óndertösje inmiddels… veur d’r Phil is d’r mer ein dink wat sjpeelt:

Groate prins waere is ummer ziene druim gewaes!

Leef luuj, wat is d’r dan nog sjoaner dan dat diene groate druim oetkump en dat ze dit jaor graote prins mógs waere van ‘t Waterratteriek!

Prinses Mariël

Mariël Cuijpers, 32 jaor, opgegruejd in Walem en knatsjgek van d’r Phil.

‘t Mariël is ei ech Walems maedje. Pap en mam, d’r Harrie en ‘t Jeanette Cuijpers wone nog ummer op Walem. Opa en oma hauwe ein graote boerderiej op d’r Kuiteberg. Dees is noe van d’r paetenonk Peter en ‘t Mariet. ‘t Mariël haet ouch noch eine broor, d’r Michel. Dae haet verkièring mit ‘t Kelly. Ein leuke hechte familie. Toch hauw némes oats verwach dat ‘t Mariël prinses van Sjin zou waere.

‘t Mariël haet versjillende vereinigingen wo ‘t zich veur inzet. De vrung van d’r carnavalsgroep “de Breuzelaere” oet Ranzel, de Buurtvereiniging Walem en de organisatie van d’r Sjaesbergergank. Toch hauw`t Mariël noats verwach dat ‘t oats Prinses van Sjin zou waere.

D’r appetièker van Hulsberg wis waal dat ze mit ‘t aannumme van ’t Mariël ein goow appetièkersassistente binne hoalde.  Toch hauw hae ouch noats verwach dat ‘t Mariël oats Prinses van Sjin zou waere.

Leefhöbberrieje haet ‘t Mariël zat-op. In d’r tuin buttele, wandele met de hung, winkele en op sjtap gaon met vriendinne. Ondanks dat ‘t oapesjteit veur väöl leefhöbberieje... hauw ‘t Mariël noats verwach dat ‘t oats prinses van Sjin zou waere.

Leef luuj, auch al hauw ’t Mariël ‘t noats verwach, ’t is dolgelökkig dat ‘t naeve ziene Prins Phil I sjteit es Prinses van Sjin.