Prinsenpagina

Op 19 november zint Prins Mika I en Prinses Nina oetgerope tot de nuuj heersjers euver ‘t Waterratteriek.

Um hun baeter te lière kinne volgt hiè de Prinselaria:

Prins Mika I (Muijrers) is op 20 augustus 1999 gebaore in Berg en Terbliet. Op zien zevende verhoesde hae nao Sjin woo hae saer daen tied mit ziene pap Roge, mam Angela en breurke Keanu op d’r Vinkeberg, naeve ’t Jeanneke, woont. Van zien auwersj, echte carnavaliste, kreeg hae ’t vastelaovendsgeveul mèt d’r paplaepel ingegaote. Mika ging dan ouch es kleine jong al sjnel biè de jeugcarnaval en viert saer 2013 de vastelaovend mèt zien vrung van de Sjin Romano’s. Hiè haet hae, nao eige zègke, tot noe toe de sjiekste dol-daag oats mèt gemak. Prins van Sjin waere is dan ouch de kroan op al dat wèrk!

Adelik blood sjtruimt durch de ódere van de familie: breurke Keanu woort in 2014 al jubileumprins van JCV de Waterretjes en kroande zich in 2020 tot keuning van ’t Nachtwachtgilde oet Berg en Terbliet. Get wat d’r pap Roge in 2014 ouch al deeg. Prins Mika wis dizze zomer ouch d’r vogel aaf te sjete en hae maog zich noe dus prins én keuning numme.

Naeve ’t vastelaovends- en sjötterslaeve is Mika ouch elke zondig op de voetbalwei te vinge. Al vanaaf de F-jes voetbalt hae in ’t dörp; ièrsj bie de Sjtröchter Boys en noe es linksback-bank van ’t kampioens-elftal SV Geuldal 2. Wièr goesj Mika gaer unne “one hundred and eighty” es darter van de Galouppe in Gullepe en sjtudeert hae Integrale Veiligheidskunde op ‘t Avans in Oeteldonk (Braobant). Daonaeve is hae in zien ‘vrie oere’ wèrkzaam bij Café ’t Hoekje en bie d’r Jan Linders in Vallekeberg.

Biè Jan Linders lièrde hae, tösje ’t sjpaor en de èrpelle zien Prinses Nina (de Visser) kinne. Nina is gebaore op 25 oktober 2001 in Vallekeberg en is saer 2017 same mèt Mika, heure prins op ’t witte paerd. Nina woont in ’t centrum van ’t Bokkerièk en hilt van lekker aete en winkele. Zeker es prinses van Prins Mika wilt ze d’r’sjiek biesjtaon. Same mèt heur twiè hung trampelt Nina gaer lekker door Vallekeberg en de natuur.

Es aafgesjtudeerd doktersassistente op ‘t VISTA college wèrk prinses Nina noe bie de MOOI kliniek in Mestreech. Carnaval is veur Nina neet weg te dinke want same mit Mika trekt ze al mènnig jaor mit de Sjin Romano’s mit in de carnavalsoptochten. 

Foto: Kaldenbach Vaals

Veer, prins Mika d’r ièrsjste,

Adelike bewoner van d’r Baanberg, keuning van t Nachtwacht-gilde, voetbalprins van SV Geuldal, dart-hoagheid van de Galouppe, keizer van het Sjinse Romano-riek en opperwaterrat van de Sjinse carnaval van Walem tot d’r Keuteberg en van Oud-Valkeberg tot d’r Krekelsbösj.

Make, biegesjtange door d’r President en d’r Wieze Raod, de noe kommende elf reigele bekint:

Ten 11e

Dat ich dit jaor same mit ’t Nina euver Sjin zal règere onger ’t motto: springe en zinge mit oud, jonk en klein, bringk os mit de vastlaovend same biè-ein 

Ten 10e

Dat ich es sjötter van Berg neet tot de nach zal wachte mit polonaise loupe en dat ich ouch in Sjin mit dees karnaval d’r vogel zal aafsjete

Ten 9e

Dat ich es sjudent integrale veiligheid same mit miene wieze raod zal zörge dat veer veilig vastelaovend kinne viere en dat veer d’r waer ein super sjiek fiès van kinne make 

Ten 8e

Dat ich weit dat ’t lestig zal waere veur het twiède van SV Geuldal, mèr ze zulle ech de kommende maonde zonger mich d’r titel motte verdeidige 

Ten 7e

Dat ich, es medewerker van het “voordeel van het zuiden”, zal zörge dat miene baas genoeg beer in de reklaam zal höbbe, zoadat veer mit de 3 doldaag neet drög komme te stjaon 

Ten 6e

Dat ich es twiède groate prins van d’r Baanberg houp dat de luuj van de stjraot, mit mich, de karnaval wille vieren. En wat zou ‘t nog sjieker zeen, es ich ouch miene prinsetempel in de stjraot zou höbbe. Messjien dat ich ins bie ’t Sjanneke kin vraoge veur ongerdaak….. 

Ten 5e

Dat adelik blood bie os in de familie zit. Miene Pap en miene broor Keanu zint al keuning van de Nachtwacht gewaes. Mer ich sjeet dit joar ech d’r vogel aaf, want ik bin én sjötterskeunig van Berg én groate prins van Sjin. Wat wilste es jonge jong van Sjin nog miè?

Ten 4e

Dat mien carnavalsvrung, de Sjin Romano’s, ‘t dit jaor neet zonger mich hove te doon. Ich beneum ze hiebiè tot prinselijke garde, zoadat ze zoaväöl meugelik, same mit mich en ’t Nina, de Sjinse vastelaovend kinne viere, van ‘t oetrope tot en mit karnavalsdinsdig

Ten 3e

Dat ich houp dat alle luuj van Sjin, Walem, Sjeumer, Ströch en Oud-Vallekeberg en ouch de Sjinse kasteleins, de vastelaovend trouw blieve en same mit os de vastelaovend wille viere

Ten 2e

Dat veer houpe dat d’r auch in Sjin waer ins nuuj weuninge gebouwd zulle waere, zoadat de jeugd in Sjin kint blieve wonen en de Sjinse vereinigingen en tradities kinne blieve bestjaon

Ten 1e

Dat veer corona kinne misse wie tandpien en dat veer vanaaf d’r 11 van d’r 11 allein nog mer besjmèt wille waere mit ’t vastelaovendsvirus!

Ten lètste

Dat mit de sjoan dinger van vreuger en huuj,
d’r Sjinse vastelaovend zal blieve veur al oos luuj.
Blief allemaol de Sjinse vastelaovend viere vanoet eur hart,
dan blief de Sjinse karnaval ummer apart.

Gegaeve i Sjin op 19 november 2022

Prins Mika d’r ièrsjste van de Waterratte same mit ’t Nina, biegesjtange door d’r President en d’r Wieze Raod