Bètste Waterratte,

D’r kop is d’r van aaf.

Aafgeloupe zaoterdig geïnstalleerd es prins Karel I van de Waterratte. Wat ein ièr um dat te maoge mètmake.  Ich ben d’r gruètsj op um dit jaor same mèt Prinses Charlotte veurop te moage loupe in de Sjinse vastelaovend.

De daag van de proclamasie is onvergaetelik.
De aovond van teveure ièrsj de familie geïnformeerd wat d’r ging gebeure en daonao nog eine houp luuj flink bie de naas gepak op de nuujjaorsreceptie van d’r voetbalclub. En dat ich ièrsj geïnsjtalleerd woort es nuuj lid van d’r RVE waor natuurlik auch ein gooj aafleidingsmanöver.

De PKC hauw eine gowe opzet bedach veur de proclamasie. Ein aantal potentiële kandidate oet d’r  zaal haole en de luuj laote raoje wae ’t zou waere. Dae opzet waor hièl good gesjlaag. De luuj achter de coulisse hauwe auch gein notie van wae ’t zou waere, totdat ’t Charlotte teveursjien kaom.

En dan ’t oetroope. Bienao ein kwarteer langk achter de sjuufdeurkes gesjtange:  geweldig um dao te maoge sjtaon, door ein spleetje nao dae zaal inkieke en te wachte totdat ’t groate moment dao is. Gelukkig waor ich neet ech zenewechtig ofsjoean ich door de sjpanning neet in sjtaot waor om beveurbeeld zellef mien sjoonsreme te sjtrikke of om de helpe vas te make.

Charlotte en ich vònge de prinseproclamasie grandioos; ’t waor vööl drökker es verwach;
de luuj van de sjutterie achter de bar hubbe hun hendjes beheurlik oet de moewe mòtte sjtaeke en ze hubbe zich auch boetegewoon good van hunne taak gekwete.

Charlotte en ich hubbe dao baove op, auch erg genaote van de euverweldigende reacties, zowaal perseunlik es auch via de sociale media. Ooze oprechte dank hie veur. ’t Waor ech geweldig en veer zalle ut altied in oos herinnering houwte.  Ich houp uch auch weer allemaol te maoge treffe op de receptie van kòmmende zondag 12 jannewarie.

 

Prins Karel 1