Henk en Roos de Esch zunt aafgeloupe zaoterdig veuraafgaond aan de jubileumresepsie beneumd tot Ridders in de Orde van de Lachende Waterrat. Veurzitter Niels Bemelmans richde óngersjtaond weurdje richting de twiè gepensioneerde kasteleins.

Naeve ‘t feit dat d'r Henk zaoterdig ei jubileum vierde van zien 11 jaorig lidmaatsjap van ós CV, is ‘t neet nieks wat Henk en Roos 32 jaor langk veur oos vereiniging, mer auch ós dörp höbbe beteikent. Via deze waeg wilt CV de Waterratte hun bedanke veur eur gasvrieheid. Henk en Roos höbbe jaorelangk mit eine lach, sóms of väölal mit ein traon, d'r kaffee gerund.

‘t is neet nieks dat Henk en Roos ummer wie’ne truie hónd op ós zoot te wachte es veer weer binne kaome valle nao middernach. Dèks sjtraolbezope besjtèlde veer dan eine koffie, d’r Huub mit e sjeutje Samboeka. E fijn plaatsj um effe ‘dr sjteek aaf te zètte, aaf te sjakele en af te biere. E moment van bezinning.

Daobie waore Henk en Roos, en zeker de lètste jaore, ei ech.. en zoa neet d’r enige, carnavalskaffee van Sjin. Óndanks get kritiese weurd die ze hub geuut nao ós vereiniging en ‘t dörp waore ze d’r altied veur ós. Zoepe in d’r gangk en pisse in d’r kelder waor óngerwiel e begrip veur väöle. ‘t Hauwe en sjtampe taege de lampe, woo d'r veurzitter zelf auch hièl dèks zich sjuldig aan haat gemak, waor veur hun noats e probleem.

Es bliek van waardering, veur 32 jaor gezelligheid, gasvrieheid en bevlaogenheid, haet ‘t besjtuur gemeind Henk en Roos te óngersjeije in de Orde Van De Lachende Waterrat. De hoagste óngersjeijing binne de Sjinse Vastelaovend die ze dubbel en diek höbbe verdeend.

Henk en Roos, nogmaals bedank en CV de Watterratte wunsjt uch ei gezónd en gelökkig waalverdeend pensjoan!

Foto's: Raoul Limpens