Leef luuj, veerbeginne bie ’t vurrig wiekend.
‘t Vriedes hauwe veer bie de Waterratte eine vrieje agenda. Ôs waor ter oare gekômme dat ‘t jeugprinsepaar dae aovend foto’s ging bringe, dus nao e verjäördaagsfièske zin v’r i burger nao cafe A ge Pannes gegange um ôs nog effe te ammezere mit de Watterretjes, wat achteraaf nog bés laat is gewore.
’t Zaoterdigs begôs ôs programma wir, mit es ièsjte de opnames van “’t Vastelaoves Kaffee” va TV Vallekeberg in “Leeuw aan de Brögk”, mit versjillende optraejes va o.a. Beppie Kraft en Katja Henz. Veer woorte hiej same mit nog get anger prinsepare oet Groat Vallekeberg geïntervjoewd en ‘t waor eine hièle gezellige middig. ’t Saoves zunt veer nao de Prinsezitting i Sjuèlder gewaes, ‘t Programme van CV de Moelemaekersj kôste vergelieke mit ‘tt vreuger Rattinee va Sjin, mit hièl väöl leuke optraejes van luuj va Sjuèlder, ein gezellige zitting mit väöl humor oet eige dörp.
’t Zôndes waor de resepsie van de Kaatboere i Kunder, jaomer genôg môste de Kaatboere op mien eige resepsie vreuger vertrékke umdat zie nog anger verplichtinge hauwe, meh op hun resepsie mochte veer metein filleseter wodurch veer ôs daonao nog gezellig “eine” kôste drinke. Trouwes prachtig um te zeen wie de luuj dao d’r ganse plefông mit balônne verseerd hauwe en ich kin uch vertélle dat ’t eine grellig groate zaal waor.
Dan op nao aafgelaupe wiekend: t Zaoterdigs wie ich truugk kaom va mien biebaantje bie de Hanos waore de mansluuj oet de sjtraot al bezig mit versere,en ze höbbe flink gaas gegaeve want’ t begint al e bietje op eine echte Prinsetempel te lieke meh de volgende waek make ze ’t mit de vrouwluuj same gans vaerdig.
‘t Saoves waor de Prinsezitting i Bemele en wat ich ech sjiek vông waor um te zeen mit wieväöl lede veer dao nao binne lepe, neet ein, twiè meh drie taofele lank zoogste de patsje van de Watterrate ziete, meh dat ziete waor ‘t’m toch neet.
Dao waor durch de drökte ech neet väöl plaatsj um väöl polonaise laupe dus höbbe veer de taofele op de benk gesjtapeld en daonao flink wiejer gefiès.
Zôndig waore veer t vrouwluujdreigestirn van de Öss oet Eys gaon fillesetere, biezônder um te zeen, zoa Dreigestirn. Ich höb mich laote vertélle dat dat neet déks veurkump en dat het in Kölle dékker veurkump meh dat ‘t in de sjtad zelf dan bestjeit oet drie mansluuj en in de umliegende dörpe auch dékker vrouwluuj zunt. ‘t Waor erg drök in Eys, meh dat wilt neet zégke dat ‘t daorum minder gezellig waor. Auch dao höbbee veer weer flink get aan oos kondisise kinne doon.

Noe ein paar daag aom haole um ‘t volgend wiekend weer flink van laer te kinne riete,
Alaaf!