’t is al vrie aardig drök gewaes sinds de prinseproclamatie van 4 jannewarie.
Mien ièsjte officiële wapefeite waore ’t bezeuke van de prinserecepties bie de Hèvers in Naorbaek en de Mirlitophile in Vallekeberg en ’t aanwezig zeen bie de prinseproclamatie van de Gaarekiekere in Göllepe. Daonao volgde oos eige good bezochde prinsereceptie op 12 jannewarie, wobie oos eige drie jubilarisse, te weite:  Willie Thimister, Ton Lemmens en Johan Wouters in ’t zunneke woorte gezat.

Nao de zeer zjwaore Ladiesnight, wo ein keur aan geweldige artieste houwe opgetraoje en de prinserecepties bie resp. de Mammoeters in Mestreech en de Boschrave in Houthem, sjtong d’r ein van de belangriekere  evenemente van de Sjinse vastelaovend op ’t programma:  de proclamatie van ’t jeugprinsepaar van de jubilerende Club 77, die dit vastelaovesseizoen mèr leefs 4 x 11 jaar besjeit.  Ein geweldig jeugprinsepaar kinne veer noe gerus al zègke. Charlotte en ich zint d’r van euvertuug dat veer same mit jeugprins Keanu 1 en jeugprinses Nina d’r ein supersjiek Sjins vastelaovesseizoen van gaon make.  Keanu en Nina höbbe auch ein prachtig, biezonder drök bezòchde receptie gehad.  Charlotte en ich zint òngerwiel toen effe hièl sjnel weg nao Berg gewaes, same mèt ein beperkte delegatie, um nao d’r prins van de Spoetnikkers in Berg te gaon. Dae prins dao toen vervolges te felicitere en geliek weer gauw truugk nao Sjin, natuurlik auch umdat de CV de meining is toegedaon, dat de evenemente in òs eige dörp veur gaon ten opzichte van welke angere activiteit dan auch.

In fibberwarie is d’r auch weer ein riekelik gevöld programma, wovan ònger angere ein bezeuk aan de Brander Stiere in Aoke.  Hievan zal ich zeker in miene volgende weblog versjlaag doon.

 

Prins Karel 1

Prinses Charlotte

 

Foto: Vastelaovend in Valkeberg